Estátua Proklamadór Francisco Xavier do Amaral iha Avenida Liberdade Imprensa rotunda Merkadu Lama. Imajen Tatoli/Jogerjo Guterres.

DILI, 11 outubru 2021 (TATOLI)—Prezidente Autoridade Munisípiu Dili, Guilhermina Filomena Saldanha, hateten iha loron 10 outubru ne’e autoridade muunsípiu Dili la selebra anversáriu sidade Dili ba dala-252 tanba pandemia COVID-19.

Autóridade Munisípiu Dili selebra sidade Dili nia aniversáriu ho atividade kampaña vasinasaun ba komunidade atu kombate COVID-19 no hamutuk ho autoridade munisipál no suku hala’o limpeza jerál iha sidade Dili.

Prezidente Autoridade Munisípiu Dili ne’e informa katak, tuir istória sidade Dili sai nu’udar Administrasaun Kapítál Timor nian iha loron 10 outubru 1769.

“Ita la selebra aniversáriu sidade Dili tanba iha situasaun estadu emerjénsia nia laran. Ita halo hela kampaña atu sensebiliza ba ita-nia sosiedade sira katak vasina ne’e importante hodi kombate COVID-19. Entaun, ida-ne’e mós bele dehan tama iha ámbitu ida festeza no ida seluk mak Administradór Postu no Xefe Suku sira halo sira-nia atividade limpeza iha kapitál Dili,” Guilhermina Filomena Saldanha hateten ba Agência Tatoli, iha Salaun Apuramentu CNE Nasionál, Caicoli, Dili, segunda ne’e.

Oinsá Polítika hosi Prezidente Autoridade Munisípiu Dili halo sidade Dili sai moos no sai sidade dame, nia hatán, Autoridade Munisípiu Dili ona polítika atu halo sidade Dili sai sidade dame maibé sei hein projetu lei poder lokál aprova lai.

“Ami labele halo buat barak tanba desentralizasaun ba servisu ida-ne’e. Kompetensia sira-ne’e seidauk delega. Maske iha lei hateten maibé seidauk iha baze legál ida dehan entrega mak ida ne’e no ida ne’e seida’uk. Iha ne’ebá fó de’it ema na’in-tolu nu’udar pontu vokál, entaun quer deizer limita ami-nia kompetensia balun ba buat mehi ne’ebé ami hakarak halo. Bainhira ami atu halo buat ida, ha’u tenke ba lai iha ministériu hodi konsulta no koordena. Entaun, buat hotu-hotu, ita-nia mehi dalaruma la sai realidade,” dehan.

Maibé, nia dehan, kompetensia ne’ebé Autoridade Munisípiu Dili tau atensaun tomak iha Munisípiu Díli mak Administrasaun Finansa, Jestaun Lixu no Jestaun Merkadu.

Prezidente Autoridade Munisípiu Dili ne’e hateten, mehi atu halo sidade Dili sai sidade dame no sidade bonita ne’e presiza ema hotu nia kontribuisaun no responsabilidade.

“Ba futuru, ita hakarak halo sidade Dili sai sidade dame no bonita, ha’u hakarak servisu ne’e abitante sira iha sidade Dili ne’e nia servisu la’ós ha’u-nian servisu nu’udar Prezidente Autoridade nein adminitsradór postu no xefe suku nian de’it. Maibé, komunidade tomak iha responsabilidade hakarak Dili ne’e sai bonita no sai sidade dame, entaun hotu-hotu ne’e presiza ka’er liman hodi tau hamutuk katak ita hakarak Díli ne’e sai sidade dame no bonita,” nia esplika.

Istória kona-ba Dili

Portugal tama iha Timor-Leste iha tinan 1512. Prezensa portugés nu’udar interasaun dahuluk entre sivilizasaun rua; Europa no Timor. Durante kolonializasaun, kapitál dahuluk ba Timor-portugés mak Lifau, lokaliza maizmenus kilómetru lima (5) husi parte oeste Pante Macassar (agora sub-rejiaun Pantemakasar) iha enklave Oé-Cusse (agora Rejiaun Administrativa Espesiál Oé-Cusse Ambeno, RAEOA).

Iha momentu ne’ebá, tuir Juan Carlos Rey (Asociacion Española de Estudios del Pacifico), Dili hanesan aldeia kiik ida ho uma sira halo no taka nia kakuluk ho tali-tahan no didin ho bebak.

Iha livru ida ho titulu “As Possessões Portuguesas na Oceânia – Descrição da Praça de Dili”, ne’ebé  hakerek hosi eskritór José Joaquim de Sousa halo deskrisaun kona-ba Praça de Dili iha tinan 1800: “Praça mak rai ne’ebé nakonu ho Talimatan”.

Iha sekulu 17 nia klaran, iha tinan 1649, Fortaleza harii iha sidade CUPÃO (Kupaun) ka agora kuñesidu ho ho naran KUPANG maibé Olanda obriga ema portugés sira tenke husik hela Kupang iha tinan 1653.

Konflitu rejionál kontra autoridade Portugés iha LIFAU-Oé-Cusse halo Governadór António José Teles de Menses halo avaliasaun ba Praça iha 11 agostu 1769 no harahun tiha LIFAU antes sira la’o-husik hela fatin ne’e.

Nune’e, kapitál foun Timor-Portugés nian harii fali iha inur Dili no dezenvolvimentu hahú hala’o iha loron 10 fulan-outubru tinan 1769. Iha tinan dahuluk ne’e, sidade Dili maizumenus harii ho grupu uma sira halo ho ai, ne’ebé proteje hosi “trincheiras e baluartes” (bee-dalan no Fortaleza). Iha tinan 1813, sidade Dili ho nia populasaun hamutuk 1,768. 

Iha tinan 1834, iha Goverandór José Maria Marques nia lideransa, Dili hamrrik hanesan sidade loloos, ne’ebé tama iha kategoria sidade tebes duni iha fulan-janeiru tinan 1864. Iha tinan 1852 ne’e, populasaun iha Dili hamuutuk 3.017 no iha tinan 1879, Dili iha populasaun hamutuk 4.114.

Entre tinan 1881 no 1888, Rafael Jácome Lopes de Andrade, halo manutensaun ba sidade Dili no halo ligasaun entre sidade Dili ho suku sira iha Dili nia sorin-sorin liuhosi dalan terrestre, harii rede de abastesimento de água e erguendo o Farol do porto (=abastesimentu bee no harii FAROL portu nian).

Iha sekulu 20, ho inspirasaun neoklasika, nia harii katedral Dili no edifsiu Câmara Municipal de Dili. Iha invazaun no okupasaun japonés (Japaun) iha Dili, durante Segundu Guerra Mundiál, konstrusaun rua refere destruidu. Ida-ne’e hanesan períodu ida-ne’ebé nakukun (negro) iha istória kona-ba DILI no TIMOR, hamosu masakre ne’ebé oho populasaun barak no destroisaun jeneralizada ne’ebé luan tebes (com massacres à população e destruição generalizada do edificado). Sidade Dili sofre bombardiamentu hamutuk 94 hosi aviaun australiano no harahun katedral Dili iha tinan 1943.

Hafoin funu entre Japaun ho Austrália, Portugés domina fali Timor, no halo re-konstrusaun ba kapitál koloniál no sentru ba populasaun sira. Durante Governadór (=governa 1959-1963), Kolonel Filipe José Freira Temudo Barata konstrui Portu Dili, estabelese esgotus, abastesimentu regular bee-nian no hadi’a fali liña eletrisidade.

Re-konstrusaun ne’e hatutan hosi Jenerál José Alberty Correia (governadór hosi 1963 to’o 1967) halo estrada prinsipál sira iha Dili hodi fui alkatraun, hanaruk períodu fornesimentu enerjia eletrika to’o horas 24 loron ida no halo regulamentu kondisaun estétika, ijiene no konfortu ba konstrsaun hotu-hotu.

Orsamentu hosi Orsamentu Jerál Estadu no Ministériu Estranjeiru utiliza ba halo konstrusan iha kapitál (Dili) mak ba Centro Emissor de telecomunicações, Oficina das Obra Públicas, Escola T’ecnica, Imprensa Nacional, Correios, Telégrafos e Telefones no Prisão, harii Portu Dili ne’ebé modrenu, armajen, ne’ebé bele simu ró ho kapasidade to’o ton 7000, hanesan ró sira hosi India no Timor hosi Companhia Colonial de Navegação. Iha tinan 1965 ne’e, abitante sira iha sidade Dili hamutuk 10.338.

Entre tinan 1968 to’o 1972, durante Jenderál José Nogueira Valente Pires nia ukun, konstrui Cámara Municipal ba abitante sira-ne’ebé ki’ak liu hodi kontribui no dezenvolve saúde públiku iha sidade laran. Iha tinan 1972, populasaun iha sidade Dili hamutuk 17.000.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here