Vise-Ministru, MAE, Lino de Jesus Torrezão, hala’o fiskalizasaun ba progresu konstrusaun Uma Kbiit Laek (UKL), iha Munisípiu Viqueque, no haree katak, atinjimentu to’o ona 52%, kinta (24/09/21). Imajen Tatoli/ Vitorino Lopes da Costa.

VIQUEQUE, 11 outubru 2021 (TATOLI)Mudansa klimátika difikulta ekipa responsável konstrusaun Uma Kbiit Laek (UKL) transporta materiál konstrusaun ba suku Bahata no Afaloikai, postu adiministrativu Uatucarbau, munisípiu Viqueque.

“Durante ne’e konstrusaun Uma Kbiit Laek iha suku rua paradu tanba mudansa klimátika, entaun difikulta transporte tula materiál konstrusaun. Iha semana kotuk ne’e, uma neen ninia pondasi halo hotu ona, hein tau tan batako,” Tékniku Programa Nasionál Dezenvolvimentu Suku (PNDS), Angelmo da Costa, hateten ba Agência TATOLI, via telefónika, segunda ne’e.

Notísia relevante: Progresu konstrusaun UKL iha Viqueque atinje 52%

Tuir responsável programa ne’e, mudansa klimátika halo progresu konstrusaun la’o neneik, foin atinje 5%, ne’ebé devia liu hosi progresu ne’e bainhira laiha empedimentu.

Kontrusaun UKL iha aldeia Builakurae, suku Bahata no aldeia Kaiwalita iha suku Afaloikai hamutuk neen.

Iha fatin ketak, Administradór postu Uatucarbau, Alfredo dos Santos, hateten, konstrusaun UKL iha suku Bahata no Afaloikai hahú la’o ona.

“Ohin, ami enkontru ho xefe suku rua ne’e no sira informa ba ha’u katak materiál konstrusaun tama ona, tanba udan para ona, ne’ebé karreta bele asesu di’ak” nia akresenta.

Tuir Autoridade postu ne’e, entre suku neen iha Uatucarbau, iha suku haat mak ninia progresu konstrusaun UKL atinje ona 40%.

Tuir rezultadu fiskalizasaun ba progresu konstrusaun UKL Viqueque, iha postu administrativu Viqueque villa Ho UKL 30 atinje ona 52%, Ossu iha 30 atinje 3%, Uatulari iha 18 atinje 0,5%, Lacluta i12 atinje 20% no Uatucarbau iha 18 atinje 37%.

Governu sei harii UKL hamutuk 1.254 iha suku 424, ho totál alokasaun orsamentu hosi tinan  2021 hamutuk millaun $25, enkuantu kustu ba kada uma entre $14.000 to’o $17.000.

Uma ne’ebé konstrui kompostu hosi tipu ka medida rua hanesan, tipu 48 m2 iha kuartu tolu, sala vizita ida no dapur, tipu 37 m2 kuartu rua, kompletu ho sala vizita ho kuziña.

Konstrusaun UKL ho objetivu korresponde ho Planu Estratéjiku Dezenvolvimentu Nasionál (PEDN) 2011-2030, ne’ebé rekoñese povu Timor-Leste nia aspirasaun atu harii nasaun ne’ebé forte, prósperu no moris di’ak.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here