Ministru Turizmu Komérsiu no Indústria, José Lucas do Carmo da Silva, akompaña Vise Domingos Lopes Antunes, foto hamutuk ho entidade relevante no parseiru sira. Imajen/ Felicidade Ximenes

DILI, 11 outubru 2021 (TATOLI)— Ministériu Turizmu, Komérsiu no Indústria (MTKI) hamutuk ho Ministériu Saúde (MS) kolabora ho United Nation Children Fund (UNICEF)  no World Food Programme (WFP) organiza konsulta nasionál ho setór privadu no sosiedade sivíl atu konsensu ba kriasaun dekretu-lei fortifikasaun aihan.  

“Ami fasilita tékniku diskusaun Nasionál ba ezbosu lei kona-ba fortifikasaun aihan  iha Timor-Leste. Dekretu lei ne’e, atu oinsá Timor-Leste bele tau importánsia ba valór nutrisaun no fortifikasaun aihan,” Vise Ministru Komérsiu no Indústria,  Domingos  Lopes  Antunes, hateten, iha otél Timor, segunda ne’e.

Programa fortifikasaun aihan  ho objetivu atu oinsá hasa’e dependénsia ba aihan  bázika tanba estatutu sósiu-ekonómiku populasaun nian, no bele lori mikro-nutriente liuhosi aihan bázika hodi mellora nutrisaun, hamenus bebé sira-ne’ebé moris ho abnormal tanba menus ferru, no hamenus taxa má nutrisaun iha Timor-Leste.

Konsulta nasionál ne’e ho objetivu atu rona opiniaun no sujestaun konstrutivu sira hosi entidade relevante sira  ba kriasaun no finalizasaun dekretu-lei fortifikasaun aihan , molok lori ba Konsellu  Ministru  halo aprovasaun.

MTKI koopera ho Ministériu Saúde hodi kontribui másimu aspetu tékniku liuliu valór nutritivu, no Ministériu Agrikultura no Peska iha área produsaun agríkola.

“Ita nia objetivu kria dekretu-lei hanesan dalan ida mais efetivu liu hodi luta kontra má nutrisaun liuhusi suplementasaun vitamina importante sira ba aihan  báziku hanesan, foos, ai-farina, masin, no seluk tan hodi responde ba defisiénsia mikro nutriente ne’ebe ita konsumu,” nia esplika.

Lejizlasaun ne’e regula produtu alimentár iha vitamina, ho baratu tuir padraun atu maioria populasaun ne’ebé moris iha liña pobreza bele asesu  no konsumu aihan  ho valór nutritivu

Iha biban hanesan, Diretór Jerál Serbisu Koorporativu Ministériu Saúde,  Marcelo Amaral,  hateten, konsulta nasionál ba kria dekreti-lei fortifikasaun aihan  hanesan politika kombate má nutrisaun iha Timor Leste.

“Tuir rezultadu peskiza  tinan 2020 hatudu katak  ema ho raes badak 47, % mak sei kontinua problema  má nutrisaun iha ita-nia rain,’’ nia informa.

Tanba, nutrisaun nuudar parte prinsipál hosi saúde no dezenvolvimentu fíziku, mental, no kria jerasaun foun sai matenek hodi bele hadi’ak ekonomia no dezenvolvimentu nasaun nian.

Tuir dadus tinan 2020 hatudu labarik idade tinan lima mai kraik  ho má nutrisaun, ras badak  47,1%, labarik idade tinan lima  mai kraik  ne’ebé krekas  8.6% no  labarik idade tinan  lima mai kraik  ho todan menus  32.1%.

Iha Timor-Leste populasaun 36% maka iha kondisaun inseguransa aihan  grave, ne’ebé 25% maka iha aihan  seguru ne’ebé barak liu hela iha Dili.

Indikadór ne’ebé lansa ona iha livru hanaran konsolida ba seguransa no aihan nutrisaun ne’e mak hakarak ema ne’ebé menus nutrisaun 24%, tenke redús ba 0%, tanba daudaun ema inseguransa aihan  36%, nune’e tenke redús ba 0%.

Enkuantu, ema ne’ebé ho ras badak daudaun iha 40%, tanba ne’e ho alvu tenke redús  pelumenus 25% to’o tinan 2030 tanba Timór adere ba Objetivu Dezenvovlimentu Sustentavel (ODS) no iha mós Planu Estratéjiku Dezenvolvimentu Nasionál (PEDN) ne’ebé ko’alia katak to’o 2030 ema hotu iha nutrisaun di’ak no aihan  hotu tenke seguru.

Jornalista :  Felicidade Ximenes

Editór   : Florêncio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here