Ministru Koordenadór Asuntu Ekonómiku (MKAE), Joaquim Amaral, entrega despaxu nomeasaun ba membru Konsellu Nasionál Traballu, iha salaun SEFOPE, Caicoli, segunda (11/10). Imajen TATOLI/Francisco Sony

DILI, 11 outubru 2021 (TATOLI)Ministru Koordenadór Asuntu Ekonómiku (MKAE), Joaquim Amaral, iha segunda ne’e, fó pose ba membru foun Konsellu Nasionál Traballu (CNT, sigla portugés) na’in-hitu no Konsellu Arbitrajen Traballu (CAT, sigla portugés) na’in-tolu, ba mandatu tinan-tolu.

Iha ámbitu ne’e, Ministru tau konfiansa ba membru foun sira no husu atu serbisu ho responsabilidade tuir lei ne’ebé iha.

“Konsellu nasionál sei hamutuk ho Governu atu buka dalan hadi’a ambiente traballu ba ita-nia ekonomia iha Timor-Leste, tanba durante tinan-rua ona ita-nia ekonomia hetan difikuldade, tanba kondisaun pandemia COVID-19,” governante ne’e hateten iha nia ninia diskursu, iha seremónia pose, iha salaun SEFOPE, Caicoli.

Membru foun ne’ebé simu pose hanesan, hanesan Prezidente CNT, Alarico de Rosário, Vise-Prezidente, Ángelo dos Santos Veloso, no membru sira mak hanesan Rofino dos Reis, Horguilina Alves, Norberto José, Almeiro Gouveia, no António da Costa.

Enkuantu, Prezidente CAT, Geraldo Moniz, Vise-Prezidente, Etelvina Sarmento, no membru mak hanesan Julio Fernandes.

Ministru enkoraja membru foun emposadu atu fó enerjia foun ba ambiente traballu hodi permite investimentu no iha mandatu foun ne’e bele rezolve problema ekonomia, liuliu saláriu mínimu ba traballadór sira.

“Prosesu saláriu mínimu agora la’o hela, maibé kestaun mak tempu de’it tanba tama ona ajenda ne’ebé ita sei to’o solusaun inklui iha revizaun ba saláriu sira tanba iha lejizlasaun ne’e rasik ita tenke haree,” nia akresenta.

Tanba ne’e, Ministru iha esperansa mandatu membru foun sira, bele rezolve saláriu mínimu ba traballadór sira, tanba prosesu ne’e mai kedas hosi anterior.

“Presiza buka meiu atubele hadi’a no rezolve, tanba ne’e espera ekipa foun agora bele hadi’a ambiente laborál, ne’ebé hanesan komponente engloba sira hotu hodi hadi’a ambiente laborál inklui ba iha sira-nia seguransa tanba ne’e mak presiza tau-matan ba lei laborál,” Ministru fó hanoin.

Membru sesante husu atualiza saláriu mínimu

Iha fatin hanesan, Vise-Prezidente Kámara Komérsiu Indústria Timor-Leste (CCI-TL, sigla portugés) Asuntu Sosiál no Relasaun Industriál, Alberto Carvalho, ne’ebé hanesan membru CNT sesante, hateten ekipa rua hahú mandatu iha tinan 2015 to’o 2020, ne’ebé serbisu boot ne’ebé sira-nia parte halo maka halo estudu no propoin saláriu mínimu, tanba ne’e presiza kontinuasaun.

“Ita kuaze apoiu saláriu mínimu ba dala-rua, maibé to’o agora sei pendente, tanba ne’e molok ami husik mandatu ne’e, rekomenda ba MKAE hamutuk ho membru foun sira atubele atualiza ka realiza proposta ne’ebé uluk kaduka,” nia fó hanoin.

Notísia relevante: Revizaun saláriu mínimu, MKAE konsidera presiza realístiku ho kondisaun ekonomia

Aleinde ne’e, Konsellu Nasionál Traballu halo tan estudu hodi propoin filafali saláriu mínimu ne’ebé agora iha hela iha meza ministériu tutela.

“Espera saida maka ami husik hela ba ita-boot sira bele kumpre lei kódigu traballu atu halo duni revizaun ba sálariu mínimu. Tanba tuir loloos ne’e iha iha ona revizaun bazeia ba kondisaun ekonomia, maibé tinan-sia ona mantein ho $115 no seidauk halo revizaun.

Nune’e, durante mandatu, Konsellu Nasionál Traballu sesante, konsege iha konkordánsia hodi hamosu desizaun administrativa kona-ba asidente traballu, ne’ebé haree traballadór sira ne’ebé hetan asidente, empregadór bele konsidera no fó indemnizasaun bazeia ba desizaun no uza ba negosiasaun mak konsellu halo.

Asuntu seluk, CNT konsege halo konkodánsia atu uniformiza oras serbisu ho turnu ba traballdór sira, ne’ebé bainhira iha futuru atu lori desizaun ne’e ba lei, kompeténsia membru foun.

Nune’e mós, Prezidente CNT emposadu, Alarico de Rosário, hateten nu’udar membru foun hakarak luta nafatin ba saláriu mínimu maski progresu han tempu.

“Durante tempu naruk Konsellu Nasionál Traballu hamutuk Sekretariadu Arbitrajen halo estudu oioin ba saláriu mínimu, ita tenke iha sentimentu ba ita-nia nasaun viziñu sira, estandariza saláriu mínimu, ho razaun parte rua ne’e halo ona peskiza iha territóriu laran tomak no halo estudu komparativu katak saláriu mínimu ne’e atu tau hira,” nia subliña.

Tuir atuál Sekretáriu Estadu Formasaun Profisionál no Empregu (SEFOPE) ne’e, progresu saláriu mínimu bele halo debate kada tinan-rua no halo revizaun, maibé buat hotu desizaun ikus iha Konsellu Ministru.

“Tanba ne’e, kona-ba montante saláriu mínimu ne’ebé Konsellu Nasionál Traballu atu propoin ba Konsellu Ministru, daudaun ne’e sei halo hela estudu atu define, tanba ne’e sei segredu,” nia akresenta.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here