Ministru Ensínu Superiór, Siénsia no Kultura (MSSK) Longuinhos dos Santos esplika importánsia hosi vasinasaun ba komunidade aldeia Liabote, suku Miligo, postu administrativu Cailaco, munisípiu Bobonaro, (11/10). Imajen Agência TATOLI/Sérgio da Cruz

BOBONARO,11 outubro 2021 (TATOLI)—Ministru Ensinu Superiór, Siénsia no Kultura (MSSK), Longuinhos dos Santos, enkoraja komunidade aldeia Liabote, suku Miligo, postu administrativu Cailaco, munisípiu Bobonaro partisipa no simu programa vasinasaun.

“Ita (Bobonaro) mós rejista ema na’in-sia mak mate ho COVID-19, inklui Cailaco oan na’in-ida, ita lakohi ema Cailaco mate tán, mak ohin ami (membru governu) mai, atu enkoraja ita boot sira simu vasinasaun hodi aumenta imunidade, hodi hadook risku transmisaun no mate iha ita-nia munisípiu, tanba COVID-19 perigu ba ema-nia vida,” Ministru Longuinhos ko’alia iha ámbitu lansamentu no  kampaña nasionál vasinasaun, iha aldeia Liabote, postu administrativu Cailaco, segunda ne’e.

Governante ne’e husu komunidade tenke simu vasina tanba vasina ne’e nu’udar kakaluk atu proteje-an rasik.

Governante ne’e, haktuir pandemia COVID-19 hamate ona ema barak iha mundu no Timor-Leste mós rejista kazu óbitu iha territoriu nasionál hamutuk 119.

Governante ne’e informa ba komunidade katak vasina la’ós atu estraga populasaun, maibé iha situasaun pandemia mundiál ne’e mak obriga ema hotu tenke simu vasina.

Nia husu komunidade labele influénsia ho informasaun hoax ne’ebe ema lansa iha mídia sosiál, maibé fiar de’it informasaun ofisiál hosi Ministériu Saúde no Organizasaun Mundiál Saúde.

“Ita-nia lideransa maun Xanana, Taur matan Ruak, Lú olo, Jenerál Lere, Ramos Horta no Mari Alkatiri mós sai ezemplu ona ba ita. Sé vasina ne’e oho ema karik, parese ohin ami sira-ne’e la hamriik iha imi-nia oin,” nia fó hanoin ba komunidade sira.

Ministru Longuinhos dos Santos, ensera ona kampaña nasionál vasinasaun kontra Covid-19 iha aldeia Liabote refere.

“Ohin, ha’u-nia misaun iha Cailaco remata ona, tanba ne’e lori VIII Governu Konstituisional nia naran, hato’o agradesimentu ba administradór, xefe suku no amá dato sira iha Cailaco, ne’ebe mak durante ne’e koopera di’ak ho ami, ha’u bele dehan ita-nia serbisu konsege halo númeru vasinasaun elevadu, tanba ita-nia numeru vasinasaun atinje 95% ona,” nia agradese komunidade.

Entertantu postu administrativu Cailaco kompostu suku ualu mak hanesan, Manapa, Purugua, Atudara, Goulolo, Raiheu, Miligo, Daudu no Genulai, ho populasaun idade 18 ba leten ho ne’ebe elijivel atu simu vasina hamutuk 4.182. Hosi numeru ne’e Cailaco atinje ona 95% kompostu hosi doze dahuluk 75% no kompleta doze daruak 20%.

Iha Fatin hanesan, Xefe Suku Miligo, Amâncio Barreto da Costa, agradese ba inisiativa Governu ne’ebé ho vontade boot partilla informasaun ba komunidade sira kona-ba importánsia vasinasaun no efeitu hosi COVID-19 nune’e aldeia Liabote na’in 64 simu ona vasina AtraZeneca kompostu hosi doze dahuluk 50 no kompleta doze 14.

“Tuir dadus hosi sentru saúde Cailaco, ita-nia totál populasaun iha suku Miligu ne’e alvu atu simu vasina mak 1.704. Hosi numeru ne’e, 1,155 simu ona doze dahuluk no kompleta 549, falta de’it  700 de’it mak seidauk simu vasina,” nia esplika.

Jornalista: Sérgio da Cruz

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here