iklan

HEADLINE, MUNISÍPIU, VIQUEQUE

Loron mundiál redusaun risku, SEPS realiza semináriu iha Viqueque

Loron mundiál redusaun risku, SEPS realiza semináriu iha Viqueque

Semináriu iha ámbitu loron mundiál redusaun risku dezastre naturál, iha suku Bahalara-uain, segunda (11/10). Imajen/Vitorino Lopes da Costa

VIQUEQUE, 11 outubru 2021 (TATOLI)—Sekretaria Estadu Protesaun Sivil (SEPS) hamutuk ho parseiru komemora loron mundiál redusaun risku dezastre, ne’ebé kada tinan sempre selebra iha loron 13 outubru, ho atividade semináriu durante loron-ida iha munisípiu Viqueque.

Tuir Xefe Departamentu Jestaun Risku Dezastre Naturál hosi SEPS, Martinho Fatima, iha atividade ne’e aprezenta meiu komunikasaun ne’ebé uza hodi komunika ba komunidade bainhira iha dezastre naturál, nune’e bele hamenus risku.

“Ita hala’o ona atividade iha nasionál, halo kafé dadeer no talk show iha loron 04 outubru, tanba ne’e iha munisípiu Viqueque ita realiza semináriu ba komunidade,” Xefe Departamentu ne’e informa ba Agência TATOLI, iha suku Bahalara-uain, segunda ne’e.

Iha fatin hanesan, tuir Reprezentante Care Internasional ba programa Dezastre Rede, Euclidas Hornai, iha maneira prevensaun tolu atu hamenus risku dezastre naturál.

“Dala barak servisu liu ba jestaun responde apoiu emerjénsia, ne’ebé ita hotu tuun ba terrenu hodi foti dadus, maibé ita la ko’alia liu jestaun, iha jestaun ita ko’alia pontu importante tolu hanesan antes dezastre, durante dezastre no hafoin dezastre redusaun,” nia akresenta.

Hosi pontu importante tolu ne’e, Komisaun Austrália Apoiu ba Umanitáriu ne’ebé hanesan ajénsia ne’ebé destaka iha Viqueque, sei serbisu hamutuk ho autoridade lokál hodi halo atendimentu ba komunidade ne’ebé hetan impaktu dezastre.

“Objetivu komisaun atu fó apoiu dezastre naturál, nune’e bele redús risku dezastre naturál,” nia akresenta.

Iha serimónia abertura atividade, Prezidente Komisaun Organizadór no atuál adiministradór munisípiu Viqueque, Januário Soares ‘Boly’, husu komunidade tenki partisipa ho di’ak iha semináriu ne’e hodi bele komprende risku dazastre naturál no bele hamenus risku.

“Ha’u husu ba imi hotu tenke partisipa hodi kompreende bainhira mosu dezastre imi bele halo prevensaun dezastre sira ne’ebé afeta ba ita,” nia akresenta.

Atividade ne’e hetan partisipasaun hosi autoridade komunidade Bikarin no Bahalata-uain, estudante no entidade relevante sira.

Jornalista : Vitorino Lopes da Costa

Editora     : Julia Chatarina

iklan
iklan

Leave a Reply

iklan
error: Content is protected !!