Autoridade RAEOA hamutuk lia-na'in Taiboko realiza seremónia rituál ba protesaun bee-matan Ulas. Imajen/mídia RAEOA.

OÉ-CUSSE, 11 outubru 2021 (TATOLI)—Autoridade Rejiaun Administrativa Espesiál Oé-Cusse-Ambeno (RAEOA) hamutuk li’a-na’in sira realiza ona serimónia rituál nune’e proteje bee-matan Ulas, suku Taiboko, sub-rejionál Pante Makassar.

Sekretáriu Rejionál Asuntu Agrikultura, Jose Eta. Imajen TATOLI/Abílio Elo Nini.

Sekretáriu Rejionál ba Asuntu Agrikultura, José Eta, hamutuk ho lia-na’in suku Taiboko realiza serimónia rituál iha bee-matan Ulas atu husu matak malirin hodi proteje bee-matan Ulas ba programa Food for Work.

Notísia Relevante :Autoridade RAEOA identifika bee-matan Oél-Ulas dada bee ba uma kain 126

Atividade serimónia rituál ne’e loke direitamente hosi lia-na’in sira hosi suku Taiboko, liuliu aldeia Ulas atu husu lisensa ba fatuk-lulik no ai-lulik atu implementa protesaun no konservasaun ba programa Food for Work ba bee-matan sira-ne’ebé autoridade hala’o iha teritóriu Oé-Cusse.

“Dezde bei’ala sira nunka halo obra ruma iha bee-matan ne’e, no la-autoriza atu halo dezenvolvimentu iha área ne’e, entaun foin daudaun programa Food for Work, autoridade identifika bee-matan rua iha Ulas envolve atu halo konservasaun, nune’e bele oferese bee-moos ba populasaun sira iha Ulas, ne’e mak ita halo rituál ne’e atu husu lisensa tanba komunidade sira halo ona lutu haleu área ne’e”, José Eta, informa ba Agência TATOLI, iha Oé-Cusse, segunda ne’e.

Serimónia kulturál ne’e realiza iha semana kotuk, hanesan mós meiu ida atu aplika tara-bandu, nune’e komunidadea labele hala’o atividade agrikultura hanesan lere-to’os, tá ai-maran, tanba fatin ne’e tama iha áreador inklui área protejida ba konservasaun bee-matan.

Xefe Suku Taiboko, Joaquin Tafin, fó-sai katak komunidade aldeia Ulas susar tebes atu asesu bee-moos, bainbain la’o dook mak foin hetan bee-moos, maibé tinan ne’e autoridade tau-matan ona atu konserva fatin refere.

“Maske seidauk hetan nia rezultadu maibé hahú realiza ona. Espera iha tempu seluk bee-matan sira-ne’e bele fó moris ona ba komunidade atu dada besik ba sira-nia hela-fatin”, nia dehan.

Entretantu, bee-matan iha suku Taiboko envolve iha programa Food for Work atu konserva bee-matan sira hamutuk rua, hanesan bee-matan Ulas ho nia área konservasaun hamutuk ektare ualu (8), no bee-matan Oéltaseo área konservasaun hamutuk ektare 14 nune’e sei fó bee-moos ba komunidade uma-kain 487 ho totál populasaun 1.936

Totál Populasaun iha suku Taiboko hamutuk 6,705, kompostu hosi aldeia Ulas 1.936, aldeia Nemun 1.894, aldeia Maquelab 1.983 no aldeia Hauboni 1.097.

Jornalista: Abílio Elo Nini
Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here