Aldeia Liabote, suku Meligo, postu administrativu Cailaco, munisípiu Bobonaro, sedauk asesu estrada no eletrisidade. Imajen Agência TATOLI/Sérgio da Cruz.

BOBONARO, 11 outubro 2021 (TATOLI)—imor-Leste ukun-aan tinan 20-resin ona, maibé komunidade aldeia Liabote, suku Meiligo, postu administrativu Cailaco, munisípiu Bobonaro, seidauk asesu estrada no eletrisidade.

“Ita ukun-an besik tinan 20 ona mós ami-nia povu seidauk sente ukun-an, sira seidauk sente dezenvolvimentu ne’ebé governu halo tanba estrada ho ahi de’it mós la tama. Komunidade aldeia Liabote hamtuku 988 ho totál uma-kain 193,” Xefe suku Miligo, Amâncio Barreto da Costa, ko’alia iha ámbitu lansamentu kampaña nasionál vasinasaun Covid-19 iha aldeia Liabote segunda ne’e.

Daudaun ne’e komunidade aldeia Liabote asesu de’it solár-panel no balu ne’ebé kapasidade ekonomia la sufiesiente, obrigatóriu tenke sunu lampariña no kamí, hodi fó naroman iha tempu kalan.

Maske aldeia refere iha poténsia ba setór agrikultura, ortikultura no pekuária, maibé kondisaun estrada sai problema boot, difikulta tebes komunidade atu asesu ba merkadu, tanba tempu udan monu-rai, fatuk monu, taka metin estrada nomos halo tahu nakonu.

“Komunidade iha-ne’e maoria moris ho agrikultór, kuda batar, fehuk, talas, koto no hakiak animál barak, maibé atu lori ba merkadu mak araska, tanba ami sente Estadu no governu ninia sentimentu ba ukun-an mak seidauk iha mai ami,” nia hateten.

Xefe Suku ne’e sente triste tanba aldeia ida ne’e uluk sai hanesan fatin deskonsentrasaun gerilleiru saudozu Nino Conis Santana maibé até agora governu seidauk tau-matan.

Entertantu, Xefe aldeia Liabote, Pascoál Lelo Bere, haktuir kondisaun estrada difikulta komunidade asesu ba fasilidade saúde tanba distánsia hosi aldeia ba sentru saúde Cailaco kuaze kilómetru hitu-resin.

“Difisil liu mak inan isin-rua atu partu, tanba distánsia dook, komunidade iha-ne’e ajuda malu lori ba to’o iha sentru saúde mak foin tuur-ahi. Ida ne’e komunidade seluk moras mós sempre halo hanesan tanba postu saúde laiha,” nia katak.

Xefe aldeia ne’e husu governu kompetente atu konsidera preokupasaun ne’e nune’e bele previstu iha orsamentu 2022, nune’e harii postu saúde iha aldeia refere.

Hatán ba preokupasaun ne’e, Ministru Ensinu Superiór Siénsia no Kultura (MESKK), Longuinhos dos Santos, promete sei aprezenta problema ne’e iha reuniaun Konsellu Ministru

“Ha’u sei informa ba Ministru Obra Públika, depois ha’u sei aprezenta iha reuniaun Konsellu Ministru atu diskute,” Governante ne’e promete.

Governante ne’e mós enkoraja autoridade lokál sira aprezenta nafatin proposta direitamente ba Ministru Obras Públika nune’e bele oriente Institutu Jestaun Ekipamentu (IJE) hodi  halo intervensaun ba kondisaun estrada molok udan monu-rai.

Jornalista : Sérgio da Cruz

Editor       : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here