Membru F-FDTL Komponente Terrestre simu vasina AstraZeneca doze daruak, iha Lanud Baucau, segunda (21/06). Imajen TATOLI/Natalino Belo.

BAUCAU, 11 outubru 2021 (TATOLI)—Komunidade iha suku Ossouala, postu administrativu Vemasse, munisípiu Baucau, hamutuk na’in-416 simu ona vasina AztraZeneca.

Notísia Relevante: MPM urgullu ho partisipasaun komunidade Baucau ba vasina

“Alvu komunidade hamutuk na’in 585 mak iha postu saúde nia kontrolu atu vasina no hosi númeru ne’e ema sira-ne’ebé simu ona vasina doze dahuluk hamutuk 416 no ema hirak ne’ebé seidauk simu vasina ne’e 169,” Xefe suku Ossouala, Filipe Zeferino Correia, hateten ba Agência Tatoli iha Ossouala, segunda ne’e.

Nia dehan, autoridade lokál sira servisu hamutuk ho postu saúde halo sensivilizasaun ba komunidade hodi enkoraza atu simu vasina, tanba vasina mak dalan úniku hodi aumenta imunidade ema ida-idak nian hodi luta kontra COVID-19.

“Ami hamutuk ho pesoál saúde iha postu saúde, tun ba iha komunidade hodi esklarese importánsia vasina no komunidade sira komprende hodi simu vasina,” nia dehan.

Notísia Relevante: Servisu Saúde Baucau planeia vasina komunidade direta iha uma

Atu aumenta tasa partisipasaun ba vasina ne’e, nia dehan, autoridade lokál sira servisu hamutuk ho pesoál saúde sira iha postu saúde iha Ossouala, hodi tun direta ba komunidade ida-idak nia hela fatin hodi fó vasina.

Suku Ossouala iha aldeia lima mak hanesan Caidenulale, Hoineuwai, Lolinunu, Waiknasa no Umaiku ho totál populasaun hamutuk 2339 ho xefe família hamutuk 503 no maioria populasaun moris nu’udar vida agrikultór.

Antes ne’e, Diretór Servisu Saúde Munisípiu Baucau, Domingos Reinaldo Guterres, informa katak hahú hosi abríl to’o semana dahuluk fulan-outubru ne’e, sidadaun ne’ebé simu ona vasina AstraZeneca hamutuk 58%, enkuantu populasaun ne’ebé seidauk simu vasina hamutuk 31.439.

Tuir dadus hosi servisu saúde munsipál, iha Baucau, ema ne’ebé foin simu vasina doze dahuluk 57,1% no doze daruak 29,2%, hosi totál populasaun 72.000-resin.

Notísia Relevante: Sidadaun 678.656 iha TL simu ona vasina

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here