Prezidente Konsellu Administrasaun APORTIL, Flávio Cardoso Neves. Imajen TATOLI/António Gonçalves

DILI, 11 outubru 2021 (TATOLI)–Prezidente Konsellu Administrasaun Autoridade Portuáriu Timor-Leste (APORTIL) Flávio Cardoso Neves, hateten, daudaun ne’e téknikamente konstrusaun Ró Berlin-Ramelau ramata ona, maibé tanba kestaun tékniku maka adia hikas entre loron 11-15 novembru tinan ne’e mak foin bele to’o Timor-Leste.

“Ró ne’e tun ona ba tasi, agora esforsu ne’ebé halo maka oinsá ró ne’e bele arranka hosi Xina mai Timór, tanba agora ema atu tama ba Xina susar, ezemplu ha’u-nia funsionáriu ida ne’ebé haruka ba Xina atu akompaña ró ne’e mai Timor-Leste, la konsege tama ba Xina tanba sistema nasaun ne’e susar atu adaota, entaun ha’u prefere nia fila hikas mai Timór,” Prezidente Konsellu Administrasaun APORTIL, informa ba Agência TATOLI, iha ninia knaar fatin, Portu Dili, segunda ne’e.

Notísia relevante: Posibilidade ró Berlin-Ramelau to’o Timor-Leste iha outubru

Maski nune’e, parte APORTIL tenta ona kontaktu ho Embaixada Timor-Leste iha Xina, maski regra iha nasaun ne’e difikulta nafatin.

Aleinde ne’e, hosi parte empreza tenke iha reprezentasaun atu lori ró mai Timór, tanba bazeia ba kontratu katak empreza responsável ba konstrusaun tenke entrega direta ba autoridade Timor-Leste mak foin halo transferénsia.

“Loloos ne’e iha fulan-outubru bele to’o ona mai, maibé tanba fallansu tékniku sira entaun muda hikas ba novembru, espera labele hasoru tan difikuldade, nune’e iha loron ne’ebé termina ona bele tuir no halo ona operasaun iha tinan ikus,” nia espera.

Nune’e, funsionáriu APORTIL na’in-ida ne’ebé mak arranka ba Xina hodi akompaña ró ne’e sei to’o fali Timór iha loron 14 novembru ne’e.

Tuir Prezidente APORTIL, razaun haruka funsionáriu ba Xina hodi akompaña ró mai Timór atu hatene progresu viajen ró, maski ikus mai labele to’o Xina tanba regulamentu sira la permite.

Enkuantu, iha loron 31 maiu 2019, Governu Timor-Leste reprezenta hosi Ministru Transporte no Komunikasaun, José Agostinho da Silva, asina akordu ho Governu Federál Alemaña no Kompañia Estaleiru Navál ‘Damen’ hodi halo konstrusaun Ró Berlin-Ramelau. Projetu ne’e Governu Alemaña kontribui millaun €7,8 no Timor-Leste millaun €7,1.

Tuir planu ró ne’e sei halo operasaun dahuluk iha tinan 2021, ho destinasaun hosi Dili bá Manatuto, Baucau, Lospalos no Viqueque.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here