DILI, 11 outubru 2021 (TATOLI)—Komisaun Nasionál Eleisaun (CNE-sigla portugés) segunda ne’e hala’o enkontru dahuluk ho Autoridade Munisípiu Dili hodi ko’alia kona–bá preparasaun eleisaun prezidensiál ne’ebé sei akontese iha tinan 2022.
Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten enkontru ida-ne’e CNE hala’o atu autoridade lokál no parseiru servisu sira-nia hanoin kona-ba preparasaun eleisaun prezidensiál nian.
Notísia Relevante: Eleisaun prezidensiál 2022: Sentru votasaun 1200 no paralelu tolu
“Ida-ne’e hanesan evaluasaun ida kontinua, atu nune’e saida mak ita halo iha 2017 no 2018. Ita agora atu halo fali ne’e iha buat balun ne’ebé ita presiza ko’alia. Ita–nia populasaun sira aumenta, entaun órgaun eleitorál rua (STAE no CNE) tenke korresponde duni ho nesesidade ne’e. Uluk iha sentru votasaun 800, agora iha hasa’e ba 1200. Ida-ne’e, ita–nia preparativu oinsá fasilita ema hotuu-hotu bele ba vota,” José Agostinho da Costa Belo hateten ba jornalista sira iha Salaun Apuramentu CNE Nasionál, Caicoli, Dili.
Nia hateten, maske iha pandemia COVID-19 nia laran maibé la signifika ho COVID-19 bele impede eleisaun, tanba rai barak halo eleisaun no órgaun eleitorál preparadu halo daudaun resensiamentu eleitorál ne’ebé CNE halo iha 01 jullu iha territóriu nasionál.
“Foin lalais iha 01 outubru ne’e, ita–nia delegasaun ba estranjeiru liu-liu ba Portugál, Reinu Unidu no ba Korea, atu fó mós biban ba ita–nia eleitór sira iha diáspora, hodi sira bele partisipa ho di’ak. Ita-nia preparasaun no esperiénsia ne’ebé natoon ona hamutuk ho komunidade internasionál, liu-liu ba pandemia COCID-19. Ita-nia preparasaun ne’e, oinsá eleisaun ne’e asegura nafatin,” nia dehan.
Kona–bá enkontru ho autoridade munisípiu seluk, Prezidente CNE informa, komisáriu CNE sira kuaze dezloka hotu kedas ba Munisípiu hodi halo sensibilizasauun kona-ba eleisaun tinan oin nian, no Prezidente CNE rasik mós hala’o vizita ba munisípiu Baucau no Viqueque hodi reuniaun ho autoridade sira.
Aleinde ne’e, nia dehan, presiza mós lider Nasionál no fundadór ba Estadu sira sira–nia hanoin hamutuk para eleisaun iha tinan oin ne’e, sai eleisaun ida di’ak no órgaun eleitorál halo preparasaun ida ne’ebé di’ak atu dignifika Estadu de Direitu Demokrátiku.
Prezidente Autoridade Munisípiu Dili, Guilhermina Filomena Saldanha, hateten enkontru ohin ne’e hanesan halo avaliasaun ida hosi atividade prosesu eleisaun ba tinan lima liubá, hodi haree ba fukun sira-ne’ebé mosu hodi hadi’a fuku sira-ne’e iha futuru.
“Ha’u hanoin ida-ne’e mak importante, tanba hosi parte CNE ho STAE mai atu fó informasaun, liu-liu kona–ba alterasaun lei foun kona–ba eleisaun prezidensiál,” nia dehan.
Entretantu, iha enkontru ne’e, partisipa mós hosi Prezidente Komisaun Nasionál Eleisaun (CNE-sigla portugés), José Agostinho da Costa Belo, Prezidente Autoridade Munisípiu Dili, Guilhermina Filomena Saldanha, Administradór Munisípiu Dili, xefe suku no delegadu suku sira iha Munisípiu Dili.
Jornalista : Nelia Fernandes
Editór : Cancio Ximenes
