Ekipa rua lansa hela kontra no ataka, Cavalo fronteira uza farda azúl no Diabun FC uza farda metan. Imajen Agência TATOLI/Sérgio da Cruz

BOBONARO, 09 outubro 2021 (TATOLI)—Ekipa Cavalo Fronteira susesu gaña títulu kampiaun jogu  femenina Bobonaro époka 2021 hafoin halakon Diabun FC ho rezultadu 2-0.

Iha inísiu jogu iha parte dahuluk (babak pertama) ekipa rua ne’e hatudu jogi ritmu aasliu hodi ezulta kontra no ataka liuhosi tátika ofensivu hotu, tanba hakarak hadau títulu kampaiaun. Nune’e Cavalo Fronteira halo kedas presaun ba rede Diabun FC tuituir malu, maibe guarda-rede Francelina Pereira konsege asegura no bola barakliu mak la kona alvu.

Ambiente jogu komesa manas liután, obriga ekipa rua tenke serbisu maka’as atu prodús rezultadu di’ak alias tenta hatama golu. Nune’e iha parte dahuluk 0-0.

Hafoin dada-ís durante menutu 15 nia laran, ekipa Cavalo Fronteira serbisu maka’as liután, halo beibeik presaun ba rede adversáriu, nune’e iha menutu 65 liuhosi sutu livre ida, jogadora Rofina Viegas Amaral ezekuta ho susesu 1-0.

Nune’e iha minutu 69 Cavalo Fronteira hetan tán opurtunidade di’ak, ne’ebé pasa hosi aRofina Viegas (13) no avansada Aurélia de Jesus (9) liuhosi nia tékniku idividuál ne’ebé ho kualidade lori Cavalo hatuur rezultadu 2-0 to’o jogu termina. Ho derrota ne’ebé Diabun FC enfrenta lori Cavalo Fronteira susesu gaña títulu kampiaun jogu femenina Bobonaro époka 2021 nian.

Entretantu, prémiu ba manán na’in sira kompostu hosi primeiru lugár Cavalo Fronteira hetan osan montante $250 ho taxa, segundu lugár Diabun FC hetan osan $200 ho taxa no terseiru lugár Faomahon FC hetan osan $150 ho taxa.

Enkuantu Mellór jogadór okupa hosi jogador avansada Cavalo fronteira, Aurelia de Jesus (9) no mellór markadór Rofina Viegas Amarál (13) ho golu 14, no ekipa mellór okupa hosi Manu Aman FC. Hosi kategoria hirak-ne’e ema ida hetan prémiu osan montante $50 dolar.

Entertantu Fundu ba realizasaun evente ne’e Asosiasaun Futeból Bobonaro (AFB) hetan alokasaun orsamentu kada fulan hosi (FFTL) ho montante rihun-ida.

Jogu ne’e lidera hosi árbitru Domingos Vicente, Mateus Marques, Lucas Felix no ofisiál árbitru Marcelino da Costa.

Prezidente Asosiasaun Futeból Bobonaro (AFB), Domingos Gouveia Moniz, hateten jogu ne’e atu halo selesaun no identifika fini jogadora feto potensiál nune’e kompete liga femenina iha nível nasionál.

“Selesaun ida-ne’e halo nune’e bele iha preparasaun ne’ebé di’akliu. Tinan oinba tuir ona liga feto nian iha nível nasionál,” nia ko’alia iha kampu futeból Maliana, sábadu ne’e.

Purtantu, Sekretáriu Autoridade Munisípiu Bobonaro, Júlio Carvalo Caero, agradese ba Asosiasaun Futeból Bonaro, tanba bele hamoris fali jogu femenina iha munisípiu refere.

“Ami parte administrasaun apoia programa no planu ne’ebe hosi federasaun no asosiasaun halo, ami sei tau iha prioridade,” nia katak.

Jornalista: Sérgio da Cruz

Ediór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here