Prezidente Asosiasaun Futeból Bobonaro, Domingos Gouveia. Imajen Agência TATOLI/Sérgio da Cruz

BOBONARO, 09 outubro 2021 (TATOLI)—Asosiasaun Futeból Bobonaro (AFB) lideradu Domingos Goveia, sei realiza jogu futeból sub-livre hodi enesera eventu futeból époka 2021 nian iha munisípiu refere.

“Iha tinan ida-ne’e ami sei tuur hamutuk ho estrutura, joga ikusliu sei akontese iha fulan-novembru nia laran, ne’e jogu naran sub-livre, tanba ne’e klubu sira prepara-aan ba, tanba ida-ne’e jogu ikus iha tinan 2021 nian,” Prezidente Asosiasaun Futeból Bobonaro, Domingos Gouveia, ko’alia iha kampu futeból Maliana, sábadu ne’e.

Nia husu klubu hirak-ne’ebé eziste iha postu administrativu Bobonaro, Atabae, Cailaco, Balibo no Lolotoe atu prepara ona nune’e kompete iha eventu ne’e.

“Jogu ne’e atu halo rame ita-nia munisípiu, nune’e mós bele hamenus konflitu iha komunidade nia leet, hodi kontribui ba pás no establidade iha ita-nia rai,” Prezidente AFB ne’e  hateten.

Tuir kalendáriu Asosiasaun Futeból Bobonaro (AFB) tinan ida sei realiza eventu futeból dala-haat, kompostu hosi sub-16, jogu sub-22, jogu femenina no jogu sub-livre.

Realizasaun atividade futeból ne’e AFB hetan fundu hosi FFTL kada fulan rihun-ida, maibé montante ne’e sei fahe ba parte rua, %30 uza ba administrasaun no %70 ba atividade ne’e.

Maibé nia esplika, atu hafurak liután eventu futeból iha munisípiu Bobonaro, sei fó formasaun ba treinadór klubu sira, atubele kompriende regra FIFA nian, nune’e la hamosu dezintendimentu entre treinadór no árbitru.

Nune’e mós sei fó formasaun ba treinadór nune’e partila tutan  informasaun téknika importante ba ninia ekipa, nune’e bele intende regra futeból.

AFB sei avalia kualidade árbitru nune’e dirije kualkér jogu iha tinan oin bele foti desizaun tuir regra FIFA nian.

Daudaun ne’e Asosiasaun Futeból Bobonaro iha árbitru kuaze 30. Hosi numeru ne’e na’in-10 ho sertifikadu nível C kompostu hosi mane ualu no feto rua, restante ho sertifikadu bázika nível D. Árbitru hirak-ne’e barak mak la ativu ona tanba okupadu ho serbisu seluk.

Purtantu, Federasaun futeból Timor-leste (FFTL) bolu árbitru Jefriano Loi Maia dos Santos (27) dirije hela liga femina nasionál iha segundu devizaun époka 2021.

Jornalista: Sérgio da Cruz

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here