Maske Boa Sorte nia pozisaun iha Tabela klasifikasaun elevada liu kompara ho Samoro maibé konsegue sai ekipa vensedór iha jogu kontinuaun ne’e. Imajen/ Asosiasaun Futsal Timor-Leste.

DILI, 08 outubru 2021 (TATOLI) – Ekipa AD Samoro ne’ebé lideradu treinadór Cipriano Vong halakon adversáriu Boa Sorte FC ho rezultadu 2-1.

Ho derrota ne’ebé enfrenta hosi Boa Sorte halo Samoro hetan pontu tolu, iha jogu ne’e kontinuasaun Pra Liga Futsal Timor – Leste iha  Jornada 14 ne’ebé hala’o iha kampu futsal FALINTIL-Forsa Defeza Timor –Leste (F-FDTL), Fatuhada, Dili, sesta kalan.

Susesu ne’ebé Samoro hetan lori ekipa refere okupa pozisaun daneen iha tabela klasifikasaun provizóriu, hafoin halakon ekipa rua, Boavista FC Timor no São Francisco Xavier FC.

Ho rezultadu ne’e, Samoro mantein ho pontu hamutuk 24. Enkuantu São Francisco iha mós pontu 24 maibé diferente no Boavista  ho pontu 22.

Maske vitória ba Samoro maibé jogu hahú hatudu ritmu aas hosi ekipa rua ne’e maibé hatudu iha kampu ‘batalla’ katak Samoro mak iha forsa ne’ebé maka’as hodi hatún nia adversáriu Boa Sorte.

Bainhira jogu hahú, ekipa rua tenke serbisu maka’as no tenke hikis-kosar metan suli ne’ebé habokon kamizola ne’bé hafalun isin iha jogu refere.

Sorte di’ak ba Samoro iha parte dahuluk (babak pertama) tanba jogadór Agripino Ximenes iha menutu 14 marka golu ba rede Boa Sorte ne’ebé la biban sátan hosi guarda-rede José Lopes. Nune’e rezultadu 1-0.

Ne’e nu’udar golu dahuluk iha parte dahuluk ne’ebé lidera hosi árbitru Helder Martins, David da Costa no  Natalino Fária.

Hafoin intervalu, tama parte daruak ekipa rua ne’e erforsa-aan tenta hatama golu atu-bele oferese pontu tolu ba sira-nia ekipa, maibé Samoro hatudu nafatin kualidade jogu ne’ebé diferente nune’e menutu 23 jogadór Aristídes Barros fura tán golu ida sai 2-0.

Ho situasaun jogu iha kampu halo ekipa Boa Sorte tenke hasa’e ritmu jogu, nun’e iha menutu 26, jogadór Ronelio Xavier responde duni golu ida muda rezultadu sai ba 2-1. Rezultadu golu hosi Boa Sorte ne’e tenke mantein to’o jogu termina.

Tanba ne’e, ekipa Boa Sorte ne’ebé lidera hosi nia treinadór Fufo Amaral tenke hela ho mamuk no pontu tolu ba Samoro.

Jornalista: Hortencio Sanchez

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here