Ramelau FC halakon FC Bermeta ho rezultadu 4-0.

DILI, 08 outubru 2021 (TATOLI) – Hafoin halakon FC Bermeta iha jornada 14 ho rezultadu 4-0 nune’e Ramelau FC hakmatek iha topu klasifikasaun provizóriu Pra Liga Futsál Timor-leste.

Ekipa Ramelau FC sesta kalan iha kampu futsál FALINTIL-Forsa Defeza Timor – Leste (F-FDTL) Fatuhada, Dili, kontinua mantein nia pozisaun nu’udar ekipa ne’ebé forte tebes iha jogu Pra Liga époka ida-ne’e kompara ho ekipa sira seluk tanba iha jornada 14 konsege manán tán Bermeta FC ho rezultadu 4-0.

Bermeta FC ho intensaun atu hatún Ramelau iha kalan ne’e, Maibé intensaun ne’e lakon de’it iha kampu futsal F-FDTL, Fahutada, Dili.

Rezultadu ne’ebé Ramelau hetan tanba maioria jogadór Ramelau iha esperiensia barak kompara ho Bermeta, nune’e iha minutu 6 de’it jogadór José da Costa dere ona rede Bermeta 1-0.

Jogu sai manas liután. Suta barak mak jogadór Bermeta sira lansa ba rede Ramelau maibé gurada rede Domingos Gama konsege salva no barak liu la kona iha alvu nune’e fó oportunidade ba Ramelau lidera jogu ne’e provizóriu to’o parte dahuluk termina.

Tanba tensaun no emosionál maka’as iha parte daruak, ekipa rua nafatin lansa kontra ho atake ne’ebé maka’as liuhosi pasa bola hosi-ain ba-ain atu luta ba vitória hodi hadau pontu tolu ne’ebé hein hela.

Ramelau serbisu maka’as iha jornada ne’e, sériu duni atu mantein pontu tolu atu la entrega de’it ba Bermeta nu’udar adversáriu. Bermeta mós luta, maibé luta hirak-ne’e hela naran de’it tanba la halo golu ruma maske menutu la’o beibeik ba oin.

Nune’e iha minutu 33, jogadór Ramelau hetan bola pasa ida hosi nia amigu José Costa no ezekuta kedas oportunidade ne’e rezulta duni golu lori kedas Ramelau ba 2-0.

Abilidade no tékniku Ramelau nian maka’as ba beibeik nune’e iha minutu 35 Luis Fereira prodús tán golu ida hodi hatuur ba 3-0.

Bermeta dada-ís naruk ona tanba hateke ba foho Ramelau nia lolon aas ida be aas, duni tuir labele ona, ís sente atu kotu de’it ona, obrigadu tenke hakne’ak hodi fó “glória” ba Ramelau ne’ebé forsa liu.

Iha minutu 38, Joel Fernandes lansa tán golu ida hatuur metin Ramelau nia skor ba 4-0. To’o minutu ikus termina laiha tán golu, nune’e vitoria ba Ramelau ho pontu iha tabela klasifikasaun provizóriu 42.

Bermeta obrigadu tenke hela ho mamuk no tabela klasifikasaun provizóriu ho pontu 15 no Ramaleu hakmatek iha topu klasifikasaun provizóriu 24. Ho rezultadu ne’e ekipa Bermeta tenke serbisu maka’as iha jornada 15 nune’e bele aumenta pontu iha tabela klasifikasaun. Jogu ne’e dirije hosi árbitru Eusebio Martins, Timotio Reis, no José Leonito.

Jornalista         : Hortencio Sanchez

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here