Diretór Servisu Saúde Munisípiu Viqueque, Francisco de Carvalho/Imajen TATOLI/ Vitorino Lopes da Costa.

VIQUEQUE, 09 Outubru 2021 (TATOLI) – Númeru kazu COVID-19 iha munisípiu Viqueque hahú menus tanba daudaun ne’e hela de’it na’in-lima iha izolamentu.

“Ohin, ita-nia kazu COVID-19 hela ema na’in-lima iha izolamentu, uluk pasiente barak maibé ita agora hahú menus,” Diretór Servisu Saúde Munisípiu Viqueque, Francisco de Carvalho, informa ba Agência TATOLI, iha salaun munisípiu Viqueque, sábadu ne’e.

Tuir dadus husi Sentru Integradu ba Jestaun Krize (CIGC, sigla portugés) fó-sai kazu pozitivu Viqueque ohin la rejista, kazu rekupradu laiha, kazu ativu na’in-lima, komulativu rekuperadu na’in-501, kazu komulativu komfirmadu na’in-511 no kazu óbitu na’in-lima.

Francisco hatutan, kazu pozitivu komesa hahú tún, presiza nafatin hasa’e taxa vasinasaun tanba ema seidauk vasina númeru hamutuk na’in 9614 (%21.9%).

“Ita-nia komunidade tenke iha konsiénsia hodi simu vasina, hodi hasa’e ita-nia imunidade,” nia katak.

Iha fatin hanesan, Ministru Transporte Komunikasaun (MTK), José Agostinho konsidera ne’e  Viqueque hatudu progresu di’ak tanba kazu pozitivu COVID-19 númeru agora tún kompara ho anteriór.

“Ha’u husu komunidade sira-ne’ebé seidauk simu vasina ne’e di’akliu ba simu vasina,” Ministru José Agostinho fó hanoin ba komunidade Viqueque.

Jornalista: Vitorino Lopes da Costa
Editór: Evaristo Martins

PUBLISIDADEiklan

HAKEREK NO HATÁN

Please enter your comment!
Please enter your name here