Ekipa Coelho FC hasoru Caesar Dante FC fahe pontu. Imajen Asosiasaun Futsal Timor-Leste.

DILI, 08 outubru 2021 (TATOLI) – Ekipa Coelho FC hasoru Caesar Dante FC fahe pontu ida iha jornada 14 iha kontinuasaun Pra Liga Futsál Timor-Leste.

Jogu entre ekipa rua, Coelho FC vs Caesar Dante FC ne’ebé hala’o iha kampu futsál FALINTIL-Forsa Defeza Timor-Leste (F-FDTL) sesta kalan, hatudu jogu ho kalma no ambiente hakmatek.

Hanesan bainbain bainhira ekipa sira hatudu jogu iha kontra no atake iha kampu laran. Maibé diferente entre ekipa rua ne’e tanba hala’o jogu ho kalma.

Maske ekipa rua ne’e lansa kontra no atake ba malu maibé la hanesan bainbain ho velosidade másimu hodi gaña pontu tolu. Jogu entre ekipa rua ne’e deside nune’e tanba Coelho ho pontu 21 iha tabela klasifikasaun provizóriu no Caesar Dante ho pontu 27, tanba ne’e ekipa rua ne’e iha zona modok ka zona seguru.

Jogu ne’e akompaña adeptu barak maibé la hanesan bainbain ‘hakilar’ hodi fó apoia ba ekipa ne’ebé sai nu’udar favoritu. Bainhira parte dahuluk (babak pertama) termina la rezulta golu nune’e rezultadu 0-0.

Hafoin deskansa menutu balun, jogadór sira dada-ís no hemu bee durante menutu 10, ekipa rua tama parte daruak (babak kedua) hatudu jogu estandarte durante menutu 20 nia laran no to’o jogu termina laiha vitória ba ekipa rua ne’e.

Menutu ikus atu termina ona, Caesar Dante hetan oportunidade di’ak tanba bola falta nune’e árbitru deside penalidade iha liña oin Coelho nian. iha penalidade ne’e, jogadór Caesar Dante, Fábio Soares lansa ba guarda rede Coelho, maibé Leandro Magno konsege salva no to’o jogu termina la rezulta golu. Nune’e ekipa ne’e fahe pontu ho rezultadu 0-0.

Jogu kontinuasaun iha jornada 14 ne’e dirije hosi árbitru Emercio Levio, Retilio Luis no Adelino Trindade.

Jornalista: Hortencio Sanchez

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here