Ekipa rua lansa hela kontra ataka ba malu, Faomahon uja roupa (Azul), Manu Aman uja roupa (matak). Imajen Tatoli/Sérgio da Cruz

BOBONARO, 08 outubru 2021 (TATOLI)-Manu Aman FC tolan rezultadu “moruk” ida iha loron ohin.  Faomahon FC halo Manu Aman lian la iha. Iha jogu femenina Bobonaro, iha kampu futebol Maliana, sesta ne’e, Faomahon FC ukun Manu Aman ho eskoru 3:0. Ho rezultadu ne’e, lori Faumahon okupa iha terseiru lugar.

Durante jogu desizivu entre ekipa rua, idaidak esforsu ho tékniku, estratéjia no abilidade rasik hodi domina bola no domina kampu hodi hetan rezultadu ida.

Tanba ambisaun ba rezultadu, dezde inisíu jogu, ekipa rua lansa kontra taka ba malu ho tékniku no tátika ida-idak nian; ekipa rua mai ho modelu jogu ofensivu hotu. Faomahon fó-presaun uluk ba rede adversáriu iha minutu 15 maibé la konsege rezulta golu ruma, tanba defeza Manu aman konsege asegura bola. Jogu kontinua la’o, Faomahon hasa’e tan ritmu jogu, ikusmai jogadora Denciana Gama (10) fura uluk golu ida iha minutu 29 hodi muda rezultadu ba 1:0.

Ambiente jogu  manas liután ,ekipa rua kontinua halo ameasa ba malu. Fomahon ataka iha liña oin ho ambisaun atu prodús tan golu maibé alvu hirak ne’e la konsege atinji tanba defeza Manu Aman metin liu. Jogu kontinua la’o, maski ekipa rua hadau-malu atu prodús golu ba malu maibé la akontese tan golu ruma, to’o abritu deside hakotu jogu primeira parte.

Dada iis. Rekupera enerjia. Tuirmai hakur ba segunda parte. Iha parte segunda ne’e, Faomahon hasa’e tan nia ritmu jogu liuhosi jogadora Denciana Gama (10) halo  defeza Manu Aman atrapala ho ninia tékniku individuál atu prodús golu, maibe la konsege no nia pasa fali ba Jesica dos Santos (12) ikusmai jogadora ne’e prodús jogu ida iha minutu 57 hodi aumenta rezultadu ba 2:0.

Maski sofre golu rua ona maibé ekipa Manu Aman sei “loke liras”, iha vontade nafatin, atu fó mós presaun ba nia adversáriu liuhosi Jogadora  Noviana Ramos (7), ikus mai defeza Faomahon hamonu nia iha área risku no arbritu deside fó penalidade. Maibé, oportunidade osan-mean ne’e jogadora  Maia Bian (6) la ezekuta ho susesu tamba guarda-rede konsege salva.

Jogu kontinua la’o deit to’o minutu rua , Jogadora avansada Jesica dos Santos, susesu fura tan nia golu daruak iha minutu 76 hodi muda rezultadu ba 3:0. Rezultadu ne’e halo treinadór Faomahon halo mudansa jogu ho modelu meiu kampu, maibe la rezulta tan golu ruma to’o arbitru deside hakotu jogu segunda parte, hodi fó vitória ba Faomahon okupa iha terseiru lugar iha Jogu femenina époka 2021.

Jogu ne’e lidera hosi Arbitru lokál João Goveia, asistente primeiru Olivio Vicente, Asistente segundu Longuinhos Correia no ofisiál Arbitru, Peregrino Reis.

Treinadór Faomahon, Alberto da Silva, sente kontenti ho rezultadu ne’ebé nia ekipa hatudu tanba konsege okupa iha terseiru lugar.

“Durante fulan ida ami treinu nia rezultadu mak ohin hatudu ami terseiru lugar. Ida ne’e, ha’u senti kontenti tebes maski preparasaun ladun diak maibé ami mós konsege halakon jogu barak,” Nia informa ba Jornalista Tatoli, iha kampu futebol Maliana, sesta ne’e hafoin jogu ramata.

Treinadór ne’e mós rekoñese ninia ekipa seidauk domina jogu tanba ne’e ba oin sei treina maka’as liután, nune’e eventu tuir mai bele gaña títulu kampeãun Jogu femenina iha Bobonaro.

Tuir oráriu hosi Asosiasaun Futebol Bobonaro (AFB), Jogu finál femenina epoka 2021 Diabun FC kontra Cavalo fronteira sei realiza iha Aban 09/10 tuku 4:00 otl, iha kampu futebol Maliana.

Jornalista: Sérgio da Cruz

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here