Sala Leitura Xanana Gusmão. Imajen/Espesiál.

DILI, 08 outubru 2021 (TATOLI)-Koordenadora Biblioteka no Relasaun Públika iha Sala Leitura Xanana Gusmão (SLXG), Maria Amaral Guterres, informa SLXG sei reativa funsionámentu biblioteka ba asesu públiku iha semana oin.

“Relasiona ho desizaun Konsellu Ministru iha loron 29 setembru 2021 ne’ebé deside hakotu ona konfinamentu no serka sanitária iha Dili ne’ebé fó biban atu normaliza hikas atividade hotu-hotu hanesan atividade aprendizajen prezensiál, atividade relijiozu, no atividade desportiva, nune’e SLXG mós iha hanoin ona atu reativa filafali nia funsionámentu normál ba públiku iha loron segunda (11/10) tinan ne’e,” Maria Amaral Guterres hateten liuhosi komunikadu ne’ebé Agência Tatoli asesu, sesta ne’e.

Ho desizaun Konsellu Ministru (KM) ne’e SLXG hanoin ona atu reativa filafali serbisu atendementu públiku hanesan baibain, maibe SLXG mós presiza atu estabelese regra balun ne’ebé relasiona ho medida prevensaun COVID19, ne’ebé mak rekomenda hosi Organizasaun Mundiál Saúde (OMS) no Ministériu Saúde (MS) hanesan fase liman, uza maskára no halo distansiamentu fiziku.

“Bainhira kliente sira mai vizita aminia fatin tenke kumpre regra sira-ne’ebé estabelesidu ona. Aleinde regra sira-ne’e, ami mós instala ona sistema ijiéne (fase liman fatin) iha aminia areadores sira. Nune’e, bele fasilita di’ak liután itania kliente sira fase liman beibeik bainhira asesu internet, lee livru, halo diskusaun interativu, vizita muzeu no halo atividade sira seluk,” nia dehan.

Atu ema labele halibur malu iha fatin ida, Sala Leitura Xanana Gusmão mós halo limitasaun ba vizitante sira iha asesu biblioteka hodi evita hada’et moras COVID19, entaun ba asesu internet ami limita fó asesu ba ema na’in-lima (5) iha oras ida no le’e livru ba ema na’in10 iha oras ida.

Iha ámbitu reativa funsionámentu biblioteka ne’e, ekipa jestaun Sala Leitura Xanana Gusmão daudaun ne’e esforsu másimu halo inspensaun ba funsionámentu komputador sira, nomós aruma kolesaun livru sira iha ida-idak nia fatin atu hafasil klinte sira asesu, bainhira hahú loke ba públiku.

Daudaun ne’e, ekipa SLG hahú halo serbisu makaas iha biblioteka, hamosuu espasu, halo inspensaun ba funsionámentu komputadór sira iha ne’ebá, inklui aruma livru sira iha ida-idak nia fatin.

Maske nune’e, provizoriamente Sala Leitura Xanana Gusmão deside atu loke de’it asesu ba biblioteka (lee livru no asesu internet), muzeu, uma mahon no audiovizuál.

“Ba aktividade adisionál sira seluk, hanesan sesaun diskusaun, interativu, semináriu, kursu no treinamentu sira sei suspende provizoriamente,” nia afirma.

Entretantu, dadaun ne’e Sala Leitura Xanana Gusmão iha funsionáriu na’inualu (8) no voluntáriu na’inrua (2) hodi halo servisu atendimentu públiku sira.

Nune’e, Sala Leitura Xanana Gusmão sei loke filafali iha loron segunda 11 outubru 2021, hahú hosi tuku 09:00 dadeer to’o tuku 17:00 lorokraik.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here