Sertidaun RDTL

COVALIMA, 08 outubru 2021 (Tatoli)—Diretòr Rejistu Sivil no Notáriadu (RSN) Munisípiu Covalima, António Sarmento, informa Rejistu Sivil no Notáriadu Covalima simu ona blanku sertidaun RDTL orijinál 1000 ne’ebé transposta hosi Dirasaun Jerál Rejistu Sivil no Notariadu (DJRN).

Notísia Relevante: RSN seidauk transporta blanku sertidaun RDTL orijinál ba Covalima

“Ami foin simu blanku sertidaun RDTL, sertidaun kazamentu, sertidaun óbitu orijinál hamutuk 1000 iha loron 02 fulan-outubru ne’e,” Diretòr Registu Sivil no Notáriadu Covalima ne’e infroma ba jornalista sira iha nia kna’ar fatin, sesta ne’e. 

Tuir nia, hahú hosi fulan-jullu no agostu ne’e, Rejistu Sivil no Notáriadu Covalima print-out sertidaun RDTL, kazamentu no óbitu ne’e provisóriu hodi uza de’it surat-tahan mutin baibain tanba laiha blanku orijinál.

“Ba sidadaun sira-ne’ebè mak durante ne’e ami print-out sertidaun RDTL ho surat-tahan mutin sira-ne’e sei uza nafatin, bainhira sidadaun sira trata dokumentu ho urjente mak ami sei print-out ho blanku orijinál, tanba blanku orijinál ne’e limitadu,” nia dehan.

Iha setembru ne’e, Rejistu Sivil no Notáriadu (RSN) munisípiu Covalima halo atendimentu ba sidadaun sira-ne’ebé trata sertidaun RDTL, kazamentu no sertidaun óbitu hamutuk 252.

Hosi númeru ne’e, kuaze 100 mak sidadaun sira-ne’ebé trata seritadaun RDTL orijinál, maibé tanba kartun limitadu entaun ema balun seidauk print-out sertidaun RDTL orijinál ne’e. 

Jornalista : Celestina Teles

Editór      : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here