Epozza Preidente da Republika, Cidalia Mouzinho akompaina husi Madre sira husi kongregasaun SCMM,PRR no KYM ALMA bainhira halao sosialisasaun moras kankru susun, serviks no nutrisaun iha Manleuana, Sesta 8/10/2021.Imajen Tatoli/Antonio Goncalves

DILI, 08 outubru 2021 (TATOLI)-Diretór Ezekutivu Ospitál Nasionál Guido Valadares (HNGV-sigla portugés), Alito Soares, hateten atu redúz númeru kankru susun no serviks iha Timor-Leste, feto sira tenki onestu ba pesoál saúde sira bainhira mosu ona sintoma husi moras rua ne’e.

Tuir dadus hahú husi tinan 2015 to’o agora, feto Timoroan ho tinan 18 ba leten pruvolta ema na’in 400 maka sofre ona moras kankru susun no serviks, tanba akontese dalabarak, pasiente sira tauk atu deklara loloos sira-nia moras ba pesoál saúde sira hodi hetan tratamentu saúde.

Notísia Relevante :Kankru Servís Ameasa Inan Feto Sira Nia Saúde

Nia hateten sosializasaun informasaun kona-bá moras kankru susun no serviks ne’e, importante tebes hodi konsensializa ema-nia mentalidade atu oinsá kontribui ba  prevene no kombate moras ne’ebé perigu ba ema nia vida.

“Entaun liuhosi sosializasaun ne’e oinsá ita halo esplikasaun klaru kona-bá kankru susun no serviks ba inan feto sira atu prevene an tanba ita ko’alia kona-bá ba moras kankru ne’e nia pursentu boot ba feto sira tanba kankru susun ne’e 99% ba feto no 1% ida de’it ba mane,” nia dehan bainhira hamutuk ho ekipa halo sosializasaun  informasaun kona-bá moras rua ne’e ba madre sira husi Kongregasaun Putri Reinha Rosari (PRR) manleu Dili ohin.

Ospitál Nasionál Guido Valadares, liuhosi sala sirúrjia daudaun ne’e, iha ona kapasidade hodi halo tratamentu no operasaun ba moras sira kauza husi kankru, maibé nia dehan kona-ba tratamentu kemotrapia no radiotrapia seidauk lao diak tanba menus ekipamentu.

Tanba ne’e, HNGV hamutuk ho Ministériu Saúde sei kontinua halo tranferénsia pasiente ho moras  króniku sira bá iha rai-liur hanesan Indonesia, Malázia no Singapura.

Ministériu Saúde liuhosi servisu Ospitál Nasionál Guido Valadares tenki halo maka halo detensaun sedu liuhosi sosializasaun informasaun, identifika liuhosi mákina diagnóstika aparellu hanesan sitólojia, estopatolojia, radiografia.

“Foin semana ida ita-nia mákina atu halo testu estopatolójia tanba mákina ne’e mak durante ita-nia Governu sosa no agora ita-nia ekipa halo hela servisu ida ne’e,” nia hateten.

Iha biban hanesan,  Esposa Prezidente Repúblika, Cidália Lopez Nobre Mouzinho Guterres, hateten sosializasaun informasaun ne’e iha ámbitu komemorasaun loron internasionál kankru susun ne’ebé sei hala’o iha loron 19 outubru 2021.

“Ha’u foti moras kankru no serviks ne’e sai prioridade ba Gabinete  Apoiu Atividade Konjuge Prezidente Repúblika (GAAC) nian tanba moras sira ne’e sai númeru boot iha ita-nia nia rai,”Espoza PR ne’e hateten.

Moras kankru susun no serviks idéntiku liu ba feto sira, entaun moras ida ne’e sai ema hotu-hotu nia  preokupasaun, entaun  atu labele hetan moras króniku ne’e dalan ida maka prevensaun.

Nune’e Diretora Fundasaun Alola liuhosi Programa Ha’u Hili Atu Kura (HALIKU), Maria Imaculada Guterres, esplika  kankru serviks mosu iha área serviks. No moras ne’e mosu selula abnormal ne’ebé  moris iha parte serviks ninian no maiória hahú iha área serviks nian.

Maibé bele mos da’et ba iha tésidu ne’ebé mak haleu serviks mak hanesan vagina, ka ba iha parte isin lolon sira seluk mak hanesan aten no aten-boot

Tanba ne’e, tuir insidénsia globál kankru serviks globalmente nu’udar kankru dahaat ne’ebé akontese ba feto sira.

“Tuir Global Cancer Statistics 2018, International Agency for Research on Cancer (1ARC) iha tinan 2018 iha totál feto liuhosi 500.000 mak rejistu ba kazu foun ba kankru serviks, hosi ne’e 270. 000 feto mak mate tanba kankru serviks no 85% mate ne’e akontese iha nasaun sira ne’ebé mak tama ba kategória low and middle income Countries),” nia esplika.

Ikusliu,  Madre PRR, Maria Leonarda, orgullu ho atividade sosilizasaun informasaun ne’e tanba aumenta koiñesimentu hodi halo prevensaun ba moras perigu ne’e.

“Tanba ita hatene katak moras sira ne’e akontese barak ona maibé dala barak moe entaun susar atu kura maibé ho sosializasaun ita-nia Espoza Prezidente Repúblika hamutuk ho parseiru sira halo esplikasaun ne’ebé kle’an ba ami, oinsá moras sira ne’e kona ita labele moe, atu ko’alia sai,” nia dehan.

Entretantu, Sosilizasaun ne’e hetan partisipasaun husi kongresaun PRR, Asosiasi Lembaga Minionaris Awam (ALMA), Suster Cinta Kasih dari Maria Bunda Yang Berbelas Kasih (SCMM), Kongregasi Yesus Maria (KYM) no seluk tan.

Notísia Relevante :Kada semana, HNGV simu pasiente kankru susun na’in-lima

Jornalista : Arminda Fonseca

Editór: Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here