Kampaña prevensaun dezastre. Imajen Tatoli/Vitorino Lopes da Costa

VIQUEQUE, 08 outubru 2021 (TATOLI)-Protesaun Sívil nasionál halo kampaña sensiblizasaun públiku kona-ba prevensaun dezastre, protesaun meiu-ambiente no konservasaun floresta ba líder komunitaria-sira husi postu adiministrativu Viqueque vila, munisípiu Viqueque.

Objetivu husi kampaña ne’e, atu komemora loron internasionál ba redusaun risku dezastre naturál ne’ebé sei komemora, iha loron 13 outubru 2021 iha munisípiu Viqueque.

“Ohin, ita halo kampaña sensibilizasaum prevensaun dezastre nian ba autoridade sira, hodi hatutan ba nia povu sira iha suku no aldeia sira,” Xefe departamentu nasionál administrasaun finansa husi diresaun Protesaun Sívil, Anacleto Caetano ba jornalista Agência Tatoli, iha salaun administrasaun postu Viqueque Vila, Beloi, sesta ne’e.

Anacleto hatutan, prevensaun ba risku fila fali ba ema ida-idak ninia konsiénsia rasik hodi prevene aan bainhira mosu dezastre ruma.

“Ita hatene katak, siklu dezastre iha oin tolu maka hanesan antes, durante no depois. Hirak ne’e halai liubá prevensaun mitigasaun no preparasaun. Maibé, ita sei foku ba antes oinsá maka ita bele halo prevensaun iha ida-idak nian bairru sira, bainhira ita hasoru situasaun emerjénsia ruma ne’ebé akontese no halo rekuperasaun,” Nia esplika.

Ezekutivu ne’e dehan, Governu anteriór nia tempu depois akontese dezastre maka foin halo responde ba dezastre, maibé husi VIII governu antes halo prevensaun situsaun dezastre mosu.

“Tanba ne’e, ha’u husu autoridade tenke hato’o tutan ba komunidade tanba ita-boot sira mak na’in ba rai sira ne’ebé hela ba, ho konsiénsia rasik hodi halo prevensaun,” Nia sujere.

Iha fatin hanesan, Administradór postu Viqueque vila, António Gregório afirma katak ho prezensa protesaun sívil hodi halo kampaña sensiblizasaun ba prevensaun dezastre nian ne’e mak estrutura suku sira tenke atensaun hodi kompriende buat ruma iha kampaña para hatutan ba komunidade iha suku no aldeia.

“Ita hatene, dezastre naturál ne’ebé akontese 4 abril liubá ne’e,liuliu iha Dili afeta tebes ba abitante sira ne’ebá, tanba ne’e ita mós tenke hatene hodi mosu dezastre karik bele halo prevesaun,” Nia hato’o.

Entretantu, iha kampaña sensiblizasaun ne’e hetan partisipasaun husi estrutura suku sanolu, husi postu adiministrativu Viqueque Vila, munisípiu Viqueque. Enkuantu, atividade kampaña ne’e hala’o durante loron rua; hahú ohin sei ramata sábadu.

Notísia relevante:Viqueque sai uma-na’in ba komemorasaun loron internasionál redusaun risku dezastre

Jornalista:Vitorino Lopesta da Costa
Editór :Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here