Reitór UNTL, João Soares Martins, akompaña hosi dekanu FMSS ko’a fita hodi inaugura edifísiu foun FMSS iha Caicoli, Dili, tersa (06/07). Imajen Tatoli/Francisco Sony

DILI, 08 outubro 2021 (TATOLI)-Vise Dekanu Asuntu Administrasaun no Finansa husi Fakuldade Siénsia Sosiál, Universidade Nasionál Timor Lorosa’e (UNTL), Julio Aparicio, adianta iha posibilidade estudante husi Fakuldade Siénsia Sosiál sei okupa sala aprendizazén foun rua ne’ebé maka foin lalais ne’e hetan inagurasaun husi Governu.

Governu liuhosi Ministériu Ensinu Superiór Siénsia no Kultura ho UNTL iha tinan 2019 konstrui ona edifisiu foun andar rua ho totál sala hamutuk 18 ba estudante Fakuldade Siénsia Saúde.

Notísia Relevante :MESSK inaugura edifísiu foun Fakuldade Medisina UNTL

No edifísiu ne’e harii ho osan hamutuk $678.752.97 husi Kompañia LINIEAR Lda, ne’ebé inagura ona husi Governu liuhusi MESSK, Longuinhos dos Santos, iha loron 6 fulan-jullu 2021. Maibé mosu dezintendimentu entre fakuldade Siénsia Sosiál no Siénsia Saúde.

“To’o agora ami seidauk simu despaixu ida atu fortifika informasaun ne’ebé ami rona, verbalmente ami rona reitór ko’alia ona ho dekanu katak atu oferese sala aula rua de’it mai ami, maibé informasaun ofisiál ami seidauk simu,” nia hateten ba Tatoli iha Caicoli, sesta ne’e.

Nia konsidera desizaun harii edifisiu foun ne’e mosu diskriminasaun, tanba edifisiu foun ne’e harii iha propriedade Fakuldade Siénsia Sosiál nian, maibé edifísiu ne’e uza husi Fakuldade Siénsia Saúde.

“Ami nia ezijensia loloos ne’e husu sala 6 ba reitór, la’os sala rua de’it. Tanba ami mós iha volume estudante ne’ebé bo’ot, ami husu ba universidade labele halo diskriminasaun ba ami,” nia hatutan.

Notísia Relevante :Edifísiu foun andár tolu ba FMSS-UNTL lori dezentendimentu

Jornalista : Tomé Amado

Editór       : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here