Primeiru-Ministru, Taur Matan Ruak, hala'o enkontru ho Prezidente Autoridade Minisípiu Dili, Guilhermina Filomena Saldanha, iha Rezidénsia Ofisiál PM Farol, sexta (08/10). Imajen TATOLI/Francisco Sony

DILI, 08 outubru 2021 (TATOLI)–Primeiru-Ministru (PM), Taur Matan Ruak, konvoka reuniaun ho Prezidente Autoridade Munisípiu (PAM) Dili, Guilhermina Filomena Saldanha, hodi atualiza progresu serbisu no simu orientasaun kona-ba dezenvolvimentu iha kapitál ne’ebé la’o hela no sei akontese iha futuru.

“Primeiru-Ministru hato’o preokupasaun kona-ba limpeza, liuliu vendedór ambulante, no mós kona-ba manutensaun orden públika,” Autoridade munisipál ne’e dehan hafoin hasoru Xefe Governu, iha Rezidénsia ofisiál Farol, sesta ne’e.

Kona-ba limpeza ba jardín públiku, tama ona iha planu munisípiu hodi halo limpeza rutina, nune’e vizitante sira bele vizita no laiha lixu.

Prezidente Autoridade Minisípiu Dili, Guilhermina Filomena Saldanha. Imajen TATOLI/Francisco Sony

“Prezidente Autoridade antes ne’e haree ona fatin balun ne’ebé fó ba empreza sira mak ezekuta, maibé iha fatin balun munisípiu Dili mak kontinua responsabiliza, ne’ebé fatin sira ne’e sai prioridade ha’u nian hodi haree didi’ak, nune’e jardín sira ne’e bele sai zona verde no oinsá haree hodi asegura, nune’e vizitante bele sente katak jardín duni la’ós jardín ne’ebé nakonu ho lixu naklekar,” Guilhermina haktuir.

Prezidente Autoridade ne’e mós apela ba públiku tantu sidadaun nasionál no internasionál, atu iha responsabilidade ba ambiente kapitál nasaun, nune’e moris iha ambiente saudável.

“Esforsu halakon soe lixu arbiru iha Dili la’ós mai de’it hosi ha’u, maibé sé de’it mak hela iha Dili hosi foho ka hosi estranjeiru, iha responsabilidade atu asegura limpeza. Munisípiu Dili hatún orientasaun ba postu administrativu no ba suku no aldeia atu idaidak asegura limpeza sira iha bairru no karreta, sira ne’ebé kontrata bele tun ba foti hodi soe iha fatin preparadu, hanesan sidadaun presiza asegura limpeza iha fatin ne’ebé hela ba”, Guilhermina apela.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here