Xefe suku Holsa, António Santa Cruz. Imajen Tatoli//Sérgio da Cruz

BOBONARO, 08 outubru 2021 (TATOLI)-Komunidade Suku Holsa, postu adminístrativu Maliana, munisípiu Bobonaro, hamutuk uma-ka’in besik 100 mak seidauk ai-han cesta bázika.

Xefe suku Holsa, António Santa Cruz, informa loron rua ba kotuk Governu distribui tan ai-han cesta bázika ba família uma-ka’in 24 ho nia membru 99, maibé komunidade besik 100 to’o agora naran laiha lista distribuisaun cesta bázika.

“Ha’u-nia komunidade ne’e momentu pagamentu subsídiu agregadu família naran laiha entaun ita reklama ikusmai osan $200 ne’e sira simu, maibé sira-nia naran iha lista distribuisaun cesta bázika mak la mai. Depois, ita reklama tan mas lista ne’e nafatin la mai, oinsá mak sira iha direitu atu simu cesta bázika. Ida ne’e ami prekupa tebes tanba xefe família besik 100 mak la hetan,” xefe suku Holsa, António Santa Cruz, informa ba Jornalista Tatoli iha nia kna’ar fatin, sesta ne’e.

Relasiona ho asuntu ne’e, autoridade lokál ne’e sujere ba ministériu implementadór atu hadi’a sistema servisu nune’e bele trata komunidade nia direitu hanesan. Alende ne’e, bainhira implementasaun programa Governu nia ba komunidade tenke halo koordenasaun serbisu di’ak ho autoridade lokál sira, hodi evita diskriminasaun iha komunidade nia leet.

“Ami autoridade lokál mak hatene liu ami-nia komunidade tanba ne’e antes atu implementa programa sira iha baze ekipa sira tenki fó uluk lista mai ami halo cross cek tiha, para menus ka liu ne’e ita halo kompletu tiha halo distribuisaun, se lae ikusmai balun hetan no balun la hetan,” nia esplika.

Maski nune’e, lider komunitáriu ne’e mós louva inisiativa Governu liu-liu durante situasaun Estadu emerjénsia tanba apoia ona subsídiu $200 no distribui ai-han cesta bázika ba komunidade hodi responde nesesidade uma-laran iha périodu pandemia Covid-19 afeta Timor-Leste.

Tuir dadus monografia populasaun suku Holsa hamutuk 7.967 ho totál uma-ka’in 1.802 ho totál aldeia ne’en mak hanesan aldeia Solugolo ho totál populasaun 2.558 kompostu hosi feto 1.287 no mane 1.271 total uma-ka’in 593.

Aldeia Bilicou totál populasaun 1.671 feto 851 no mane 820 ho totál uma-kain 372, aldeia Oplegul totál populasaun 1.509 feto 766 no mane 743 ho totál uma-kain 355.

Aldeia Lolo’oa totál populasaun 1.105 feto 555 no mane 550 ho totál uma-ka’in 239, aldeia Secar totál populasaun 692 feto 349 no mane 343 ho totál uma-ka’in 163, enkuantu aldeia Taz totál populasaun 432 feto 230 no mane  202 ho totál uma-ka’in 100.

Jornalista   : Sérgio da Cruz

Editór         :  Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here