Kankru susun. Ilustrasaun/Espesiál.

OÉ-CUSSE, 08 outubru 2021 (TATOLI)—Durante iha situsaun pandemia COVID-19 ne’ebé akontese iha marsu 2020 to’o ohin loron, Hospitál Referál Rejiaun Administrativa Espesiál Oé-Cusse Ambeno (RAEOA), rejista pasiente kankru susun hamutuk na’in-tolu.

“Iha fulan-jullu 2020, óspital ne’e rejista kazu kankru susun ida (1). Iha 2021, iha fulan-janeiru ne’e rejista-tán kazu rua. Hosi kazu kankru susun tolu ne’e, na’in ida mate,” Diretóra Klinika Hospitál Referál Oé-Cusse, Agnes Bana, informa ba Agência Tatoli iha Horta, Oé-Cusse, sexta ne’e

Nia fundamenta, prosesu tratamentu kazu tolu ne’e iha Hospitál Oé-Cusse só diagnóstika tuir klinika nia kapasidade, tanba iha Hospitál Referál Oé-Cusse seidauk iha doutór espesialista atu apoiu hanesan Biospia Aspiration Aguja Fina (BAAF) ne’ebé atu halo diagnóstika kle’an.

“Kazu tolu ne’e óspitál labele halo atendimentu, entaun ita refere pasiente sira sofre moras ne’e, ba konsulta iha HNGV. Maibé, liuhosi konsultasaun ho parte família sira, fó esplikasaun kuandu konkorda mak óspitál refere ba HNGV maibé família lakohi ne’e labele halao referénsia ba nasionál,” nia dehan.

Aleinde ne’e, prosesu balun ne’ebé óspitál hala’o mak bainhira pasiente fila hosi Hospitál Nasionál Guido Valadares, ho estadiu terminál ka estadiu ikus, nune’e maka doutór espesialista sirurjia hala’o kna’ar hanesan fó tratamentu paliativu, sanitária no mastektomia.

“Tratamentu paliativu ne’e hanesan bainhira pasiente sente moras presiza fó tratamentu kona-ba aimoruk, tratamentu sanitária hanesan iha pasiente balun ho estadio ikus, pasiente mai ho kanek grave ona, mak hospitál hala’o kurativu loro-loron to’o alta. Tratamentu mastectomia hanesan tratamentu quirúrgico atu hasai hotu pasiente nia moras ne’ebé afetadu ho kankru, nune’e mak moras ne’e nia abut labele habelár-tán ba fatin seluk. Maibé prosesu ne’e sempre hala’o iha Hospitál Nasionál,” nia informa.

Risku hosi moras kankru susun ne’e mak herencia familiár ka moras jenetika (turunan), hosi jerasaun ba jerasaun hanesan, menarquia precoz, primipara, trastornos ovaricos, obesidade no idade mayor.

Nia haktuir, atividade sensibilizasaun ba efeitu moras kankru susun, ekipa saúde iha RAEOA durante ne’e kontinua habelar nafatin ba komunidade sira, liuhosi postu saúde no sentru saúde sira, nune’e bele informa ba komunidade sira iha área remota hodi hatene moras ne’e no bele hakbesik-an ba fasilidade saúde atu hetan tratamentu nomós halo prevensaun ba moras ne’e.

Jornalista : Abílio Elo Nini

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here