Claudia Ximenes (hamriik), idade 14, Estudante Pré-Sekundária Daisoli, Aileu, sesta ne’e asume kargu nu’udar Prezidente Conselho de Imprensa ne’ebé okupa hosi Prezidente Conselho de Imprensa, Virgílio da Silva Guterres, durante oras ida. Imajen/Mídia CI.

DILI, 08 outubru 2021 (TATOLI)—Plan International hili Claudia Ximenes, idade 14, Estudante Pré-Sekundária Daisoli, iha Munisípiu Aileu, sesta ne’e asume kargu nu’udar Prezidente Conselho de Imprensa ne’ebé okupa hosi Prezidente Conselho de Imprensa, Virgílio da Silva Guterres, durante oras ida.

Jestór ba Programa Parentidade no Nutrisaun, Dircia L. M. Sarmento, hateten programa ne’ebé Plan International halo hodi huli labarik feto sira toma pozisaun iha oras ida-nia laran ne’e, hanesan kampaña ida, atu nune’e labarik feto sira bele aprende sai lideransa.

“Ida-ne’e hanesan maneira ida fó oportunidade ba labarik feto sira, atu nune’e iha oras ida-nia laran sira bele asume pozisaun. Ida-ne’e hanesan prosesu aprendizajen ida ba sira, bainhira sira iha mehi ida-ne’e sira bele realiza,” Dircia L. M. Sarmento hateten ba jornalista sira, iha edifísiu Konsellu Imprensa, Quintál Boot, Dili.

Atividade ida-ne’e hanesan mensajen ida ba labarik feto sira seluk iha munisípiu Aileu, Ainaro, nune’e mós iha Timor laran tomak katak mehi ne’e bele realiza maibé importante mak sira bele aprende no labele tauk atu bele realiza sira-nia mehi.

“Ida-ne’e hanesan kampaña global ne’ebé Plan International halo atu fó oportunidade ba labarik feto sira atu lidera. Ami husu ba Governu atu nune’e fó fatin no espasu ba labarik feto sira atu sira bele aprende deside no lidera,” nia dehan.

Programa ne’e, Plan International realiza iha munisípiu tolu mak hanesan iha Munisípiu Aileu, Ainaro no Dili.

Hafoin asume kargu nu’udar Prezidente Conselho de Imprensa drante oras ida-nia laran, Claudia Ximenes (hamriik), idade 14, hasai retratu hamuutuk ho Prezidente Conselho de Imprensa, Virgílio da Silva Guterres, no reprezentante mídia sira. Imajen/Mídia CI.

“Iha Dili, ami foti hanesan ohin, labarik feto sai Prezidente Conselho de Imprensa no iha loron rua liubá ami ba iha Embaixada Austrália, no sei ba iha UNICEF. Ida-ne’e hanesan parte ida-ne’ebé ami halo hodi selebra loron mundiál labarik nian, ne’ebé sei realiza iha loron 11 fulan-outubru,” nia informa.

Nia informa, agora daudaun iha Aileu no Ainaro, labarik feto balun nomea sai hanesan Komandante Polísia iha Aileu no iha Ainaro, nune’e labarik feto sira assume mós pozisaun hanesan Xefe Suku no Diretór Saúde.

Iha sorin seluk, Claudia Ximenes, hateten durante asume kargu nu’udar Prezidente Conselho de Imprensa, nia aprende buat barak kona-ba oinsá bele lidera, deside no moris buras.

“Ha’u atu deside oinsá hau-nia mehi ba futuru liuhosi hakaas an no esforsu, atu nune’e bele realiza saida mak ha’u mehi iha futuru mai,” nia dehan.

Ho programa ida-ne’e, planu ba oin mak tenke iha mudansa no nia husu ba feto maluk sira atu  labele tauk no moe bainhira iha ema barak nia oin.

“Ha’u husu ba feto maluk sira atu asesu no partisipa iha formasaun no atividade saida de’it, no labale moe no tauk bainhira iha ema barak nia oin,” nia dehan.

Entretantu, programa ida-ne’e realiza tanba uza orsamentu Plan International nian ho gastu orsamentu hamutuk $50,000.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here