Reprezentante KBRI-TL iha RAEOA hasai retratu hamutuuk ho manan-na'in sira. Imajen Tatoli/Abílio Elo Nini.

OÉ-CUSSE, 08 outubru 2021 (TATOLI)—Kompetisaun konta istória tradisionál ho lian málaiu ne’ebé Kedutaan Besar Republik Indonesia (KBRI) realiza iha RAEOA, iha ámbitu komemorasaun loron ‘Bulan Bahasa’’ ne’e lori kompetitór Carianto de Araújo eleitu sai primeiru lugar.

Notísia Relevante: KBRI selebra “Bulan Bahasa” ho kompetisaun konta istória tradisionál iha RAEOA

Kompetitór Carianto de Aroujo, idade 18, eskola iha segundu ano departamentu Mekanika hosi Eskola Tékniku Vokasionál Lifau. Iha kompetisaun ne’e, liuhosi talentu, jestu, pronunsia no haktuir istória ho sistemátiku mak lori Carinato de Araújo eleitu sai primeiru lugar.

Kompetitór Carianto de Araújo ne’ebé eleitu sai primeiru lugar simu prémiu hosi komisaun organizadora. Imajen Tatoli/Abílio Elo Nini.

“Ha’u sente kontente tebes tanba liuhosi prosesu naruk nakonu ho susar, nune’e mak ohin ha’u bele hamnasa iha palku leten. Susesu ne’e hetan tanba hetan apoiu másimu hosi ha’u-nia profesór sira hamutuk ho kolega sira inklui ha’u-nia familia ne’ebé fó korajén ba ha’u mak ohin atinje rezultadu sai primeiru lugar,” Carianto de Aroujo espresa nia sentiment haksolok ba Agênsia Tatoli, iha Edifisiu KBRI, Oé-Cusse, sesta ne’e.

Reprezentante embaixada RI no konsulada iha RAEOA, Marya Onny Silaban, informa kompetisaun konta istória tradisonál ho dalen málaiu ne’e la’ós tanba premiu no la’ós tanba primeiru lugár.

Maibé, nia dehan, liuhosi esforsu prepasaun kleur tebes, ida-ne’e mak sai valór boot tanba prepara-an másimu hatudu ko’alia dalen málaiu ho kualidade tebes.

“Kompetitór/a hotu-hotu hetan apresiasaun (juara) tanba fini espiritu atu kompete iha kompetisaun ne’e iha ona iha estuduante ida-idak, no espiritu atu fiar an mós mosu iha estdudante hirak ne’e. Ida-ne’e mak sai kapitál prinsipál ne’ebé bele dezenvolve an iha ámbitu globalizasaun nia laran,” nia dehan.

Nia hatutan, loron ohin ne’e hatudu katak rai Oé-Cuse nu’udar enclave, ne’ebé ho profesór/a sira-nia apoiu eduka no lori estduante bele kompete iha eventu importante ida-ne’e.

“Serimónia ne’e ami sei kontinua tán iha tempu besik nia laran. Profesór no jerente eskola sira tenke badinas fó hanorin estduante sira ho abilidade ne’ebé sira ida-idak iha.

Rezultadu kompetisaun ne’e, terseiru lugár hosi Eskola Sekundária Jerál Palaban, Adalgiza Recardina Sequeira, segundu ano iha siénsia naturál, segundu lugár hosi Eskola Katolika Sto. Antonio Oé-Cusse, Brigida Faria, segundu ano iha siensia naturál no primeiru lugár mak Carianto de Aroujo hosi Eskola Téknika Vokasionál Lifau segundu ano iha departementu mekanika. 

Kompetitór sira-ne’ebé tuir kompetisaun iha selebrasaun ‘Bulan Bahasa’ ne’e mai hosi eskola lima mak Eskola Téknika Vokasionál Lifau, Escola Téknika Vokasionál Palaban, Eskola Secundáriu Gerál Palaban, Eskola Katólika Sto. Antonio Oé-Cusse no Eskola Sekundária Jerál Baqui ho kompetitór hamutuk estudante na’in-15.

Ekipa juri ba kompetisaun “Bulan Bahasa” ne’e kompostu hosi ema na’in-tolu mesak sidadun Indonézia mak juri dahuluk naran Heri Purnawan, daruak naran Gabriel Yasintus Nahak no juri datoluk Marten Son Tnaob.

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here