Vise prezidente konsellu Veteranu Munisípiu Covalima Osório Soares Mausoko. Imajen Tatoli/Celestina Teles.

COVALIMA, 07 outubru 2021 (TATOLI)—Vise Prezidente Konsellu Veteranu Munisípiu Covalima (KVMC), Osório Soares Mausoko, husu ba veteranu sira hakbesik an ba sentru saúde atu simu vasina hodi prevene transmisaun COVID-19 iha Timor-Leste.   

“Ha’u hato’o ba ita-boot sira tenke simu vasina, tanba ne’e ita-boot sira tenke konsentra iha sede Suku Fohorem atu simu vasina hodi haforsa imunidade no bele kombate COVID-19 iha Covalima nomós iha Timor-Leste,” Osório Soares hato’o liuhosi nia diskursu, iha serimónia kampaña vasinasaun nasionál ne’ebé hala’o hosi Vise-Ministru Edukasaun Juventdue no Despostu, Antonio Guterres, iha Postu Administrativu Fohorem, kinta ne’e.

Husu ba veteranu sira tenke simu vasina tanba bainhara atu halo viajen hosi postu administrativu ba Suai Vila ne’e, iha ponu entrada ne’e seguransa sira hala’o pasa revista mak laiha kartaun vasina entaun bele prejudika hodi halo viajen ba-mai.

Nia apela ba veteranu sira atu labele tauk ba simu vasina no labele tauk ba COVID-19, maibé tenke kontribui hodi halo prevensaun ba COVID-19 ne’e ho ninia dalan ikus mak tenke prontu atu simu vasina.

“Veteranu sira labele impede programa hosi Governu tanba veteranu sira hanesan parseiru hosi Governu, no veteranu sira tenke fó apoiu ba Governu nia programa liu-liu ba programa vasinasaun ne’e,” nia dehan. 

Dadus hosi Ministériu Saúde haktuir, abitante ne’ebè vasina ona iha Munisípiu Covalima okupa segundu lugar iha nivel Nasionál.

Antes ne’e, Diretór Servisu saúde Munisípiu Covalima, fó sai dadus abitante 62,9% vasina ona ho total númeru vasina doze dahuluk na’in 26,206 no doze daruak 6,687. Alvu hosi servisu saúde Munisípiu Covalima maka abitante simu vasina   presiza atinje 80%.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here