Pesoál saúde vasina komuunidade iha sub-rejiaun Nitibe. Imajen/Mídia ZEESM.

DILI, 06 outubru 2021 (TATOLI)—Vasinasaun hanesan estratéjia ida ne’ebé mak importante tebes iha Timor-Leste, hodi proteje ema hasoru moras sira inklui COVID-19, sarampo, rubella no hepatitis B.

Vasinasaun ne’e disponivel liuhusi servisu saúde Governu nian iha Timor-Leste, maibé eziste variasaun substansiál iha entendimentu vasina oioin ba iha munisípiu sira ne’ebé diferente.

Foin lalais ne’e lansa ona, estudu seroprevalénsia nasionál foun ida, ho objetivu deskreve extensaun imunidade nian ba moras sira ne’ebé mak bele prevene ho vasina, inklui COVID-19, sarampo, rubella, hepatitis B no denge iha Timor-Leste.

“Importante tebes atu hatene kona-ba ema na’in hira mak iha imunidade ba moras infesiozu sira ne’e iha Timor-Leste, atu bele fornese dadus ne’ebé mak bazeia ba evidénsia, hodi bele guia Ministériu Saúde nia polítika no estratéjia hodi kontrola no elimina moras hirak ne’e iha Timor-Leste,” Investigadór prinsipál  Menzies Nelson Martins, hateten iha komunikadu ne’ebé TATOLI asesu ohin.

Nune’e mós, Co-Investigadór Sentru Nasionál Peskiza  no Vijilánsia ba Imunizasaun (NCIRS) Sarah Sheridan, konkorda rezultadu estudu ne’e provavelmente hodi reforsa Timor-Leste nia kapasidade atu efisientemente prevene surtu iha futuru husi moras sira hanesan sarampo no rubella liuhusi permite kampaña vasinasaun ba iha populasaun sira ne’ebé mak seidauk simu imunizasaun.

Depois de transmisaun signifikante husi COVID-19 iha Timór laran tomak iha tinan 2021, determina proporsaun husi populasaun ne’ebé mak iha evidénsia imunidade hodi kontra COVID-19 tantu husi infesaun ka  vasinasaun, ne’e sei ajuda planeamentu ba resposta saúde públika nian ne’ebé mak daudaun ne’e la’o hela.

“Estudu ida ne’e importante tebes liu liu ba kazu COVID-19 nian iha Timor Leste no sei ajuda sentru integradu jestaun krize (SIJK) hodi kompriende prevalénsia husi COVID-19 iha Timor Leste,’’ Xefi departamentu Peskiza iha INS, Caetano Gusmão, informa.

Ekipa peskiza ba estudu seroprevalénsia nasionál ida ne’e, lidera husi dr Nelson Martins (Investigadór Prinsipal, Menzies), aprezenta proposta peskiza nian hamutuk ho Dr Sarah Louise Sheridan (Co-Investigador, NCIRS) ba iha Komite Étika Teknikál no Peskiza nian iha Institutu Nasionál Saúde (INS), Dili.

Ekipa estudu sei halo vizita ba uma-kain ne’ebé hili ona aleatoriamente (secara acak), no sei konvida ema atu partisipa kuaze 5.000 ba leten, husi kada munisípiu iha Timor-Leste.

Estudu foun ida ne’e Menzies mak sei realiza liu husi nia projetu ARIA-RISE, parseria ho Ministériu Saúde Timor-Leste, Laboratóriu Nasional Saúde (LNS), no Sentru Nasionál Peskiza no Vijilánsia ba Imunizasaun (NCIRS), no finansia liu husi Governu Australia nia Departamentu Negósiu Estranjeiru no Komérsiu (DFAT).

Jornalista   : Felicidade Ximenes

Editór         : Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here