Responsável Uma Mahon Fundasaun Forum Komunikasaun Juventude (F-FCJ, sigla portugés) Oratóriu Don Bosco Balide-Miguel Magone, Domingas Perreira. Imajen Tatoli/Cipriano Colo.

DILI, 07 outubru 2021 (TATOLI)-Uma Mahon Fundasaun Forum Komunikasaun Juventude (F-FCJ,sigla portugés), Oratóriu Don Bosco Balide-Miguel Magone, Dili, to’o oras ne’e, seidauk simu orsamentu ne’ebé maka transfere husi Ministériu Solidaridade Sosiál no Inkluzaun (MSSI).

Responsável husi Uma Mahon F-FCJ, Domingas Perreira, esplika iha inísiu tinan 2021parte rua (MSSI-F-FCJ-red)asina ona nota kooperasaun hodi asesu orsamentu item subvensaun públika ho valór rihun $70-resin, maibé to’o agora seidauk hetan transferénsia husi Governu.

Notísia Relevante:“Ami husu Governu tau matan ba vítima sira iha uma mahon”

“Difikuldade boot ne’ebé ami hasoru iha tinan ida ne’e mak hahú hosi janeiru mai agora fulan outubru ne’e ami-nia fundu loloos ne’e mai hosi MSSI, maske ami-nia kontratu osan ho montante rihun 70-resin,”nia hateten iha Balide Dili, kinta ne’e.

Ho problema finanseira ne’ebé afeta husi problema globál COVID-19, nia konta tuir katak sai difikuldade boot atu fó atendimentu ba labarik sira ne’ebé maka daudaun ne’e hela iha uma mahon refere.

“Ita osan mós laiha, maibé ami nafatin fuan boot hodi atende vítima sira maske orsamentu laiha, ami nafatin konsola sira nune’e sira labele hanoin barak,” Domingas hateten.

Mezmu nune’e, uma-mahon ne’e nafatin halo esforsu hodi hetan apoiu sasán nesesidade bázika hanesan foos, no seluk tan husi The Asia Foundation, Ministériu Solidaridade Sosiál no Inkluzaun, Gabinete apoiu atividade konjuge husi Prezidensia Repúblika no seluk tan.

To’o ohin, Responsável husi Uma Mahon F-FCJ, Domingas Perreira, informa iha loron rua liubá simu ona informasaun husi parte MSSI katak sira halo ona prosesu transferénsia orsamentu ne’e ba Ministériu Finansa.

Hahú husi janeiru to’o outobru 2021 ne’e, nia parte fó ona atendimentu ba labarik  no inan sira hamutuk ema na’in 125 ne’ebé afetadu husi kazu abuzu seksuál, insestu, violasaun seksuál, abandonadu no seluk tan.

“Hosi númeru ne’e sira la’os hela metin hotu, maibé sira ne’ebé hela metin mak idade hahú hosi labarik to’o adolsente tinan 1 to’o 20 hamutuk ema na’in 28 ho bebé na’in 30,”nia relata.

Notísia Relevante: F-FCJ husu PN introdús projetu-lei protesaun labarik ho inkluziva

Jornalista : Arminda Fonseca

Editór : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here