Samoro vs Academica. Imajen Tatoli//Hortencio Sanchez

DILI, 06 outubru 2021 (TATOLI) – Ekipa hosi Universidade Nasional Timor Lorosae (UNTL) ho naran istimadu Academica FC obrigadu tenke hakru’uk ba nia adversáriu AD Samoro iha jogu kontinuasaun Pra Liga Futsal Timor – Leste ne’ebé hala’o kuarta kalan ne’e iha kampu Futsal FALINTIL-Forsa Defeza Timor – Leste (F-FDTL) Fatuhada Dili.

Ekipa azul ne’e tenke derrota iha jornada 13 ne’e, tanba forsa la to’o hasoru Samoro ne’ebé iha forsa, tekniku no abilidade ne’ebé makas hodi domina bola no kampu, labele sukat ho Academica nia kapasidade jogu.

Adeptu Academica nian domina liu iha kampu futsal ne’e hodi fó apoiu maibé jogadór sira iha kampu laran la hatudu seriedade ba jogu to’o ikus tenke lakon ho eskore ne’ebé boot 7-1. Halo adeptu sira obrigadu lian lakon ida, ida, to’o la iha; fahe malu laiha lian ne’ebé hakilar tan.

Hanesan kultura ba ekipa hotu bainhira jogu hahú tenke hatudu tékniku jogu tuir saida mak treinadór ekipa rua haraik ba sira.

Samoro hamriik metin iha nia pozisaun hodi hatudu duni nia jogu bonito atu halo kontente nia adeptu sira maski la barak hanesan Academica nian. Maibé, sira kontente.

Nune’e iha minutu 5 jogadór Samoro Aristides Barros loke ona odamatan golu hodi muda rezultadu ba 1-0. La kle’ur tan iha minutu 7 Candido Silva “dere” tan golu ida hodi dudu eskore ba 2-0.

Maski jogu la maka’as maibé Academica hatudu duni jogu no fera manutolun ne’ebé sei tomak liuhosi jogadór Vivaldo Magno iha minutu ualu hodi nakfilak rezultadu ba 2-1.

Rezultadu ne’e tenke mantein to’o jogu termina tanba laiha tan golu ruma mak akontese ba ekipa rua ne’e, too minutu 20, árbitru tenke hú arbitu termina jogu hodi dada iis minutu balun hafoin kontinua fali jogu.

Dolar ba segunda parte, Samoro ne’ebé lidera hosi nia treinadór Cipriano Vong halo mudansa ba tékniku jogu nune’e rezulta duni vitória ba Samoro hodi hadau pontu tolu iha tabela klasifikasaun provizóriu.

Jogadór Academica sira tenke serbisu maka’as maibé Samoro la fó fatin halo sira iis atu kotu de’it iha kampu laran, maibé la fó ameasa bola maka’as ba guarda-rede Samoro ne’ebé guarda hosi Filipe Vong.

Tanba Academica hala’o jogu defensivu la moris fó oportunidade di’ak ba Samoro hodi ense golu tutuir malu.

Nune’e, iha minutu 23 Carlos Lay prodús tan golu ho bola velosidade maka’as sutu hosi liña klaran ba rede Academica rezulta duni golu hodi tau rezultadu ba 3-1.

Samoro avontade hala’o jogu tanba parte Academica la dun halo defensivu ne’ebé másimu hodi hamate jogu Samoro nian to’o iha minutu 27 Andre Vong halo tan golu hodi dada rezultadu namlele dook ona hosi Academica ba 4-1.

Samoro domina iha kampu laran, pintas bola ba mai halo Academica sira tenke halai sala no la hetan bola no iha minutu Francisco Vong fura tan rede Academica hodi halo rezultadu ba 5-1. La’ós ne’e de’it iha minutu 31 Agripino Ximenes mós halo tan golu lori eskore ba 6-1 no eskore ikus taka ho golu ne’ebé lansa hosi Ermelindo Vong iha minutu 38 halo rezultadu tuur metin ba 7-1.

Hosi rezultadu ne’e Samoro mak iha direitu absoluta ba hetan pontu tolu no Academica tenke simu realidade zero hein fali jogu tuirmai.

Jogu ne’e dirije hosi árbitru primeiru Helder Martins, ‘arbitru segundu David Da Costa no árbitru rezerva Natalino Faria.

Eskuad Samoro

Filipe Vong (2). Andre (10). José Gusmão (19). Aristides Pires (22 no Carlos Fernandes (16).

Eskuad Academica

Gastão Dias (1). Basilio Mendes (2). Candido Silva (11). Rene Escurial (13). Vivaldo Magno (3).

Jornalista: Hortencio Sanchez

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here