Servisu interkoneksaun. Imajen/Espesiál

DILI, 07 outubro 2021 (TATOLI)-Magnífiku Reitór Universidade da Paz (UNPAZ), Adolmando Amaral, konsidera kompañia operadór telekomunikasaun sira maka benefísia barak liu ba programa Governu nian ne’ebé liga ho subsídiu internet gratuita ba estudante sira tanba liña internet la funsiona ho di’ak.

Tuir dadus totál estudante UNPAZ purvolta rihun 9-resin, maibé barak la asesu subsídiu kona-ba internet gratuita husi Governu liuhosi kuota internet ne’ebé fornese husi kompañia operadór telekomunikasaun sira.

Notísia Relevante:Estudante ensinu superiór 30,311 asesu liña internet

Estudante barak laiha smartphone, laiha laptop no hela iha área remota durante implementasaun Estadu Emerjénsia liga ho COVID-19, tanba ne’e sira la asesu internet ho di’ak.

“Ita sujere ba ministériu di’ak liu matéria aprendizajen hanesan ne’e fó sai de’it hosi televizaun duke kontratu fali operadór sira, maibé labele ajuda atu rezolve problema estudante sira-nian,” Adolmando levanta kestaun ne’e liuhosi Tatoli, iha ninia servisu fatin UNPAZ Dili, ohin.

Tuir polítika Governu hodi implementa programa subsídiu internet gratuita ne’e ho intensaun atu fasilita prosesu aprendizajen ba estudante sira durante hela iha uma relasiona ho coronavirus, maibé programa Governu nian ne’e benefisia de’it parte balun.

“Ami halo ona avaliasaun ba polítika utilizasaun liña internet iha ámbitu pandemia. Ami-nia dosente sira ne’ebé hala’o atividade aprendizajen online ne’e hasoru difikuldade, tanba velosidade liña internet lentu demais, matéria ne’ebé dosente manda ba estudante sira barak la tama,” reitór UNPAZ ne’e hateten.

Entretantu, Governu aprova millaun $14 ba izensaun propinas ba estudante universitáriu millaun $5.4 ba subsídiu internet gratuita ba estudante, iha ne’ebé millaun $2.1 aloka ba Ministériu Ensinu Superiór Siénsia no Kultura (MESSK) no millaun $ 3-resin aloka ba Ministériu Edukasaun Juventude no Desportu (MEJD) hodi ezekuta.

Jornalista : Tomé Amado

Editór       : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here