Reprezentante Organizasaun Mundiál Saúde (OMS) iha Timor-Leste, Arvind Mathur, entrega mákina printer braille ba Diretor Ezekutivu Asosiasaun Halibur Difisiensia Matan TL (AHDMTL) Gaspar Afonso, iha salaun AHDMTL, kinta (07/10). Imajen Tatoli/Francisco Sony.

DILI, 07 outubru 2021 (TATOLI)—Organizasaun Mundiál Saúde (OMS)iha Timor-Leste, kinta ne’e apoia mákina printer braille ba Asosiasaun Halibur Defisiénsia Matan Timor–Leste (AHDMTL).

Diretór Ezekutivu Asosiasaun Halibur Defisiénsia Matan Timor–Leste (AHDMTL) Gaspar Afonso, hateten apoia ida-ne’e akontese tanba AHDMTL servisu hamutuk ho OMS iha tempu pandemia COVID-19, tanba OMS bele responde pedidu ho urjentamente. 

“Ohin, Rajesh Pandav maske fila ona maibé kontinuasaun Arvind Mathur mai fali kontinua fó apoiu no ohin ita bele hetan Printer Braille,” Gaspar Afonso hateten liuhosi ninia diskursu iha serimónia entrega mákina printer braille iha edifísiu AHDMTL, Manleuana, Dili, kuarta ne’e.

Gaspar Afonso hato’o agradesimentu ba Organizasaun Mundiál Saúude (OMS) tanba iha vontade di’ak fasilita AHMDTL ho printer braille. Printer braille ne’e, tuir planu sei uza ba emprime livru no matéria sira seluk.

Nia dehan, AHDMTL hanesan organizasaun ida-ne’ebé hakarak servi ninia ema ho defisiénsia matan sira, tanba no bazea ba dadus sensu 2015 ne’e totál ema ho defisiénsia iha TimorLeste hamutuk 38.118.

“Ho printer braille ida-ne’e bele fasilita ona ami, tanba buat hotu-hotu ami hakarak tradús tantu konstituisaun RDTL de’it mós ami hakarak tradús. Tanba, ami halo advokasia ne’e, ami bazea ba baze legál sira-ne’ebé mak vigór iha Timor. Ho ida-ne’e, ohin, ami kontente loos tanba ami bele iha printer braille ida,” nia hateten.

Mákina printer vraille. Imajen/Espesiál.

Iha serimónia entrega mákina printer braille ne’e, Diretór Ezekutivu AHDMTL rekomenda mós ba OMS atu bele kontinua fó apoia iha parte rekursu umanu, tanba AHDMTL nia ema sira sei limitadu hodi halo operasaun ba printer braille ida-ne’e.

Reprezentante Organizasaun Mundiál Saúde (OMS) iha Timor-Leste, Arvind Mathur, hateten sente kontente tebes bainhira hamutuk ho maluk ema ho desfisiénsia matan sira (AHDMTL) iha momentu sira hanesan ne’e.

“Iha momentu ida-ne’e, hodi hatene katak buat balun ne’ebé ami iha durante situasaun COVID-19 ne’e, maibé ha’u nafatin iha kompromisu no fó nafatin esperansa katak ba futuru buka nafatin apoiu ruma ne’ebé bele kolabora hamutuk ho AHDMTL. Maibé, iha momentu ida ne’e, husu tebes ba ita hotu-hotu atu nafatin asesu ba iha fasilidade saúde ho nune’e bele hetan vasina,” nia dehan.

Iha serimónia entrega ekipamentu printer brille ba AHDMTL ne’e, hosi parte AHDMTL entrega perfil AHDMTL nian ba Reprezenta OMS iha TL, ho nune’e OMS bele hatene programa no ezisténsia AHDMTL iha Timor Leste.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here