Ministru Ensinu Susperiór Siénsia no Kultura (MSSK), Longuinhos dos Santos, hala’o lansamentu kampaña nasionál vasinasaun iha suku Purugua, postu adminístrativu Cailaco, munisípiu Bobonaro. Imajen Tatoli/Sérgio da Cruz

“Ha’u-nia inan-aman no komunidade labele ta’uk tanba ita-nia aman nasaun Xanana Gusmão, Taur Matan Ruak, Lú-olo, Ramos Horta, Jenerál Lere Anan Timur mós simu hotu. Se ai-moruk ne’e la di’ak karik sira ho ami mak mate uluk tanba ami simu tiha ona”

BOBONARO, 07 outubru 2021 (TATOLI)-Ministru Ensinu Superiór Siénsia no Kultura (MSSK), Longinhos dos Santos, iha ámbitu lansamentu  kampaña nasionál Vasinasaun, konsiensializa komunidade suku Purugua, postu administrativu Cailaco, munisípiu Bobonaro, atu kontribui ativu iha programa Governu ne’e, hodi proteze an hosi Covid-19.

Governante ne’e hateten, Covid-19 hanesan inimigu invizivel, tanba ne’e atu asegura no halo prevensaun ba moras ne’e komunidade hotu tenki simu vasina kompletu.

“Uluk ita halo funu inimigu sira mai sira tiru ita haree, mas agora virus Corona ne’e ita la haree, entaun ita atu satan ida ne’e ninia biru mak tenke vasina para fó forsa ita no kuandu ita hotu simu ona vasina nia hamenus risku hadaet, mate mós menus no ita kontribui hamenus moras iha ospitál para fó fali oportunidade ba médiku sira atu halo tratamentu ba moras seluk,” Governante  ne’e hateten iha Sede aldeia Purugua, kinta ne’e.

Ezekutivu ne’e akresenta, Governu aplika vasina ba nia komunidade, ho objetivu atu proteze no prevene komunidade hosi transmisaun Covid-19.

Tan ne’e nia apela ba komunidade Purugua katak labele influénsia hosi informasaun hoax ka bosok ne’ebé mak ema iresponsablidade lansa iha media sosiál tanba dadaun ne’e lider nasionál sira simu hotu ona vasina kompletu hodi proteze sira-nia an rasik no familia hosi Covid-19.

“Ha’u-nia inan-aman no komunidade labele ta’uk tanba ita-nia aman nasaun Xanana Gusmão, Taur Matan Ruak, Lú-olo, Ramos Horta, Jenerál Lere Anan Timur mós simu hotu. Se ai-moruk ne’e la di’ak karik sira ho ami mak mate uluk tanba ami simu tiha ona,” Nia apela.

Governante ne’e afirma, Governu deside oferese vasina tipu AstraZeneca atu salva-guarda populasaun Timor-leste, la’ós atu hodi vasina atu estraga ema nia vida.

“Vasina ne’e ema matenek-na’in hosi nasaun boot sira halo ona teste katak ne’e seguru ba ema nia vida no la fó impaktu negativu. Entaun, iha situasaun ida hanesan úniku solusaun mak tenki vasina para ita-nia atividade edukasaun, ekonomia no kulturál bele la’o normal fila fali,” Nia fó-hanoin.

Nia subliña, dadaun ne’e Governu mós halo ona  desizaun katak kualker realizasaun atividade ka eventu boot ruma iha nasionál to’o munisípiu, sidadaun hotu ne’ebé atu ba partisiapa iha serimónia ne’e tenki aprezenta kartaun vasina no bainhira laiha sei la autoriza atu partisipa.

Entertantu iha atividade lansamentu ne’e, Governante ne’e esplika vizaun no misaun Estadu no Governu nia kona-ba prekupasaun Covid-19, alende ne’e Loke Filamajen ka evidénsia hosi lider nasionál no testamuña sira ne’ebé simu ona vasina, atu nune’e bele enkoraza komunidade labele ta’uk atu simu vasina.

Iha fatin hanesan, Xefe Suku Purugua,Paulino Bere Pelu, ninia populasaun elíjivel hamutuk 65% mak simu ona vasina doze primeiru no kompleta.

“Totál ha’u-nia populasaun ne’ebé alvu atu simu vasina ne’e hamutuk 402, agora simu ona doze primeiru na’in 186, no doze kompleta 41 sei falta 227 mak seidauk simu,” Nia relata.

Relasiona ho númeru ne’e, autoridade lokál ne’e sei esforsu atu nafatin partilla informasaun ba komunidade ne’ebé seidauk simu, nune’e bele bele atinje meta ne’ebé Governu hakarak katak populasaun Timor-Leste 80% tenki simu hotu vasina.

Iha biban ne’e, lider komunitariu ne’e mós louva inisiativa Governu ne’e tanba ho prezensa Ministru ensinu superiór, siénsia no kultura nian bele komvense duni populasaun, ikusmai komunidade na’in 20 tan mak simu ona vasina, maski balun la partisipa.

Entertantu, komunidade, Josefina de Jesus, senti kontenti ho prezensa membru governu nian tanba bele fahe ona hanoin pozitivu hodi motiva sira simu vasina.

“Uluk ne’e ami ta’uk tanba ema ida la mai esplika loloos kona-ba vasina maibé ohin ami rona ona ita-nia na’in ulun ko’alia katak vasina ne’e importante ba ita-nia saúde, entaun  ha’u fiar no deside simu tiha. Agora ha’u senti normál hanesan babain,”Nia fó-sasin.

Komunidade ne’e garante katak ba oin sei fahe informasaun tutan ba ninia família no komunidade viziñu sira atu mai simu vasina, nune’e bele livre halo movimentu, ba fatin hotu-hotu ,tanba vasina bele proteze ona sira hosi kontajia Covid-19.

Tuir dadaus ne’ebé Sentru saude Cailaco rejista, komunidade postu administrativu Cailaco, hosi idade 18 ba leten ho komorblidade ne’ebé simu ona vasina dahuluk hamutuk 66,7% no doze kompletu hamutuk 20%. Enkuantu, totál populasaun alvu ne’ebé atu simu vasina hamutuk 4.182, simu ona doze primeiru no kompleta hamutuk 3.492 no falta 1.593 mak seidauk simu vasina.

Jornalista: Sérgio da Cruz

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here