Tribunál Distritál Dili (TDD),aplika Termu Identidade Rezidensia (TIR) ba arguidu ho inisiál ATDCS nu’udar membru PCIC, kinta 07/10/21. Imajen Tatoli// Nelson de Sousa

DILI, 07 outubru 2021 (TATOLI)-Tribunál Distritál Dili (TDD), liuhosi desizaun primeiru interrogatóriu aplika ona Termu Identidade Rezidénsia (TIR) ba arguidu ho inisiál  ATDCS nu’udar membru hosi Polísia Sientífika Investigasaun Kriminál (PCIC, siglá portugés).

Arguidu kumpre ona detensaun iha sela Polísia Nasionál Timor-Leste (PNTL), komandu munisípiu Dili, hodi kontinua submete ba primeiru interrogatóriu iha Tribunál.

“Medida koasaun ne’ebé Tribunál aplika TIR ba arguidu hodi liberta hosi sela no ho aplikasaun atu identifika nune’e bainhira prosesu investigasaun notifika karik tuir identifikasaun,” Advogada Privada, Adelina Meluk de Jesus Lobu, hateten ba jornalista iha TDD, Mandarin, kinta ne’e.

Nia dehan, Tribunál  sente medida  TIR adekuadu liu atu asegura prosesu investigasaun no seidauk ko’alia kona-ba faktu sira provadu ka lae.

No, Tribunál entende arguidu sei  la perturba prosesu investigasaun no koopera ho autoridade judisiál.

Nune’e parte Ministériu Públiku (MP) iha prosesu ne’e sei hala’o  investigasaun liután hodi aprezenta prova iha julgamentu normál tuirmai.

Iha prosesu ne’e, Ministéiru Públiku  promove arguidu ho Krime obstrusaun ba autoridade públika ne’ebé previstu iha artigu  243 kódigu penál.

Hosi artigu ne’e deskreve iha alínea 1, ema ne’ebé, ho violénsia ka ameasa grave hasoru funsionáriu ka forsa militár, militarizada ka polisiál nia ajente, la husik nia prátika aktu kona-ba nia funsaun ka halo nia prátika aktu hasoru nia devér sei hetan pena prizaun tinan rua to’o neen.

Iha alinea 2, kuandu aktu referidu iha númeru anteriór halo duni ka impede duni sei aplika pena prizaun tinan  rua to’o  ualu.

Antes ne’e, tuir kronolojia, iha loron 04/10 kalan, ekipa investigasaun Komandu  PNTL munisípiu Dili hala’o operasaun ba atividade jogu bola guling iha área Dom Bosco Comoro, Dili no arguidu tenta impede serbisu PNTL nian.

Hafoin ne’e, ekipa PNTL tenta hakalma maibé arguidu la kopera no hakanek membru PNTL ida iha parte ulun.

Primeiru interrogatóriu ne’e prezide hosi juís António Gonçalves, Ministériu Públiku reprezenta hosi Prokuradór Hernanio Rangel, arguidu hetan asisténsia legál hosi advogadu privada.

Entertantu, tuir observasaun jornalista Agência Tatoli lorokraik ne’e  iha resintu TDD nakonu ho membru PNTL no PCIC balun hodi akompaña prosesu primeiru interrogatóriu refere.

Notísia relevante:PCIC fó asisténsia ba nia membru no la interven serbisu PNTL

Jornalista:Nelson de Sousa

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here