Ministru Asuntu Parlamentár no Komunikasaun Sosiál, Francisco Martins da Costa Perreira Jerónimo no Turizmu, Komérsiu no Indústria, José Lucas do Carmo da Silva, loke simbolikamente plaka ‘Naroman ba Suku, nu’udar lansamentu programa, iha sede suku Nahareka kinta (07/10). Imajen TATOLI/Florêncio Miranda Ximenes

VIQUEQUE, 07 outubru 2021 (TATOLI)—Governu liuhosi Ministériu Asuntu Parlamentár no Komunikasaun Sosiál (MAPKOMS) lansa programa Governu iha povu nia le’et ‘Naroman ba Suku’ iha suku Nahareka, postu administrativu Ossu, munisípiu Viqueque no iha tempu hanesan halo diálogu ho komunidade lokál.

Entidade relevante ne’ebé akompaña Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, iha ámbitu lansamentu programa ‘Naroman ba Suku iha sede suku Nahareka kinta (07/10). Imajen TATOLI/Florêncio Miranda Ximenes

“Ohin, ita lansa programa Governu iha povu nia le’et, liuhosi Naroman ba Suku, atu fó Naroman ba suku iha Nahareka atubele asesu no fahe informasaun kona-ba potensialidade iha suku ne’e ba públiku, iha nível nasionál inklui  asesu prosesu dezenvolvimentu hotu hodi kontribui ba prosesu dezenvolvimentu iha suku, postu to’o nível nasionál,” Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, hateten, bainhira lansa programa ne’e, iha sede suku Nahareka, kinta ne’e.

Ministru esplika, programa Governu ne’e nu’udar prioridade  VIII Governu Konstitusionál, ho intensaun atu lori informasaun ba nível lokál besik ba komunidade sira iha área rurál hodi fó oportunidade ba komunidade hato’o preokupasaun no obstákulu ne’ebé lokál hasoru.

Nune’e, atividade ne’e lori besik Governu ba komunidade, hodi fó solusaun ba problema ne’ebé populasaun hasoru no transmite preokupasaun sira ba ministériu relevante sira atu promove partisipasaun iha prosesu dezenvolvimentu.

“VIII Governu Konstitusionál hakarak investimentu konsentra iha ema, hodi mobiliza malu hato’o preokupasaun no atividade sira, liuhosi informasaun ba públiku atu hatene potensialidade suku Nahareka,” Ministru akresenta.

Plaka programa ‘Naroman ba Suku iha sede suku Nahareka kinta (07/10). Imajen TATOLI/Florêncio Miranda Ximenes

Programa Governu iha povu nia le’et, iha sub-programa ho atividade sira hanesan kriasaun sentru informasaun suku rurál, ne’ebé daudaun ne’e estabelesidu ona balun, atu harii ka promove kriasaun biblioteka komunitária iha suku rurál, diálogu komunitáriu no vídeo konferénsia ho membru Governu sira atu responde ba preokupasaun sira.

Notísia relevante: Komunidade Suku Soilesu Fó Hanoin SEKOMS Harii Biblioteka Komunitária

“Ha’u-nia ekipa téknika sei mai atu fó kapasitasaun ba joven-sira iha suku, atubele jere sentru informasaun, liuliu hatene hakerek, halo vídeo no foto, hodi partilla potensialidade suku ba nível nasionál,” governante ne’e garante.

Nune’e mós, MAPKOMS agradese ba povu iha suku Nahareka, ne’ebé ho kontente simu programa Governu iha povu nia le’et ‘Naroman ba Suku’.

Reprezentante Administradór agradese Governu

Iha biban hanesan, Sekretáriu Administradór munisípiu Viqueque, José da Costa, agradese ba Governu tanba hili ona suku Nahareka, hosi suku 35 iha Viqueque hodi implementa programa.

“Lansamentu Naroman ba Suku importante ba povu suku Nahareka, tanba suku 36 ne’ebé iha munisípiu Viqueque, foin dahuluk implementa no ami agradese ba ida-ne’e,” nia dehan.

Tuir nia, lansamentu programa iha suku Nahareka sai exemplu di’ak ba suku sira seluk iha munisípiu Viqueque atubele organiza-an hodi kontribui ba prosesu dezenvolvimentu iha nível suku to’o nasionál.

Xefe suku Nahareka, Paulino A. Ximenes. Imajen TATOLI/Florêncio Miranda Ximenes

Xefe suku Nahareka, postu administrativu Ossu, munisípiu Viqueque, Paulino A. Ximenes, apresia ho inisiativa Governu.

“Ami agradese ba Governu  hili ami-nia fatin ne’e atu implementa programa Governu iha povu nia le’et, Naroman ba suku,” Xefe suku Paulino akresenta.

Suku Nahareka kompostu hosi aldeia Macabu’u, Maurate, Darenau, Samarogo, no Raila’a, ho totál populasaun 2.000-resin, hosi uma ka’in 500-resin

“Ha’u sei hamutuk ho populasaun hodi asegura implementasaun programa, atu sai susesu, nune’e bele promove potensialidade suku ba nível nasionál,” nia garante.

Nune’e mós, Adjutu Komandante Polísia Nasionál Timor-Leste (PNTL) munisípiu Viqueque, Superintendente José Afonso, garante parte seguransa prontu asegura programa Governu ne’ebé implementa iha munisípiu ne’e.

“Ami prontu atu asegura prorama Naroman ba Suku hodi populasaun bele fasil asesu informasaun no hasa’e informasaun kona-ba preokupasaun no potensialidade saida mak iha, atu Governu sentrál bele rezolve,” Adjuntu PNTL ne’e garante.

Joven suku Nahareka husu akompaña implementa programa

Reprezentante Juventude suku Nahareka, Jorgino Anacleto, ho esperansa boot programa Naroman ba Suku bele fó benefisiu, liuliu lori naroman ba povu iha suku ne’e.

Komunidade lokál antuziasmu partisipa iha lansamentu programa ‘Naroman ba Suku iha sede suku Nahareka kinta (07/10). Imajen TATOLI/Florêncio Miranda Ximenes

“Ami agradese ba Governu, maibé husu atu kontinua akompaña nafatin ami hodi hetan benefísiu, liuliu infraestrutura bázika hodi nesesita populasaun,” nia afirma.

Nune’e, joven iha sira suku ne’e prontu atu koopera ho ekipa MAPKOMS, hodi simu formasaun téknika hodi fó susesu ba programa.

Governu implementa ona programa Governu iha povu nia le’et ‘Naroman ba Suku’ iha suku 11, iha munisípiu Lautém, Viqueque, Baucau, Liquiçá, Bobonaro, Ermera, Manufahi, Aileu, Covalima, no Ainaro, hafoin halo lansamentu ofisiál dahuluk iha suku Rotutu iha Manufahi iha tinan 2018.

Notísia relevante: SEKOMS Inaugura Sentru Informasaun iha Suku Rotutu

Serémonia ne’e partisipa hosi Ministru Turizmu, Komérsiu no Indústria, José Lucas do Carmo da Silva, Prezidente Konsellu Diretivu Agência TATOLI, I.P, Manuel Pinto, Diretór Ezekutivu Agência de Tecnologia da Informação e Comunicação Timor, Institutu Públiku (TIC Timor, I.P), Roberto Caetano de Sousa Vicente, Reprezentante Komandante PNTL munisipál, entidade relevante, konvidadu no komunidade lokál.

Durante tinan 2019 to’o 2020, Governu implementa ona programa Naroman ba Suku iha suku tolu lokalizadu iha parte leste, hanesan Hae-coni iha postu administrativu Baguia, munisípiu Baucau, suku Muapetine no Lore II iha munisípiu Lautém, parte sul iha suku Liurai, munisípiu Aileu no suku Rotuto, iha munisípiu Manufahi, enkuantu parte oeste iha suku Leo-hitu no Soelesu iha munisípiu Bobonaro no suku Batumanu, postu administrativu Atsabe, munisípiu Ermera.

Enkuantu, iha tinan 2021, tuir planu programa sei implementa tan iha suku haat tuir kapasidade no rekursu ministériu implementadór programa.

Ba kada suku ne’ebé sai benefisiáriu, Governu fó apoiu orsamentu maizumenus $10.000 liuhosi transferénsia públika, hodi harii Sentru Informasaun ba komunidade no implementa programa Naroman ba Suku.

Programa Naroman ba Suku nu’udar programa pilotu hosi VIII Governu Konstitusionál, ho objetivu haat mak hanesan promove asesu ba informasaun iha suku rurál no hakbiit komunidade sira-nia kapasidade asesu ba informasaun.

Programa ne’e buka atu lori informasaun ba nível lokál besik ba komunidade sira iha suku hodi fó dalan ba komunidade atu hato’o sira-nia preokupasaun ka obstákulu sira ne’ebé mak sira hasoru hodi aprezenta ba meiu komunikasaun nasionál sira.

Jornalista : Florêncio Miranda Ximenes

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here