Kontrusaun Uma Kbiit Laek iha aldeia Noe-Ninen, suku Cunha. Imajen Tatoli/Abílio Elo Nini.

OÉ-CUSSE, 07 outubru 2021 (TATOLI)—Konstrusaun Uma Kbiit Laek (UKL) iha aldeia Noe-Ninen, suku Cunha, sub-rejiaun Pante Makasar, Rejiaun Administrativa Espesiál Oé-Cuse Ambeno (RAEOA) ninia progresu fiziku atinje ona 45%.

Notísia Relevante: PNDS RAEOA konstrui “Uma Kbiit Laek” unidade rua iha Noe-Ninen

“Konstrusaun Uma Kbiit Laek unidade rua iha Noe-Ninen ne’e ninia progresu fiziku atuál la’o daudaun no atinje ona 45%. Uma ne’e ho tipu no medida 6×7+ metru ida (1) ba varanda nian. Nia medida hanesan ho montante orsamentu hamutuk $43,000,” Diretór Programa Nasionál Dezenvolvimentu Suku (PNDS) RAEOA, Sebastião Tanesi, informa ba Agência Tatoli iha Palaban, Oé-Cusse, kinta ne’e.

Iha RAEOA, nia informa, iha suku 17 mak seidauk implementa konstrusaun tanba orsamentu infraestrutura ba Uma Kbiit Laek ne’e sei prosesa hela iha Ministériu Administrasaun Estatál, maibé tuir konsultasaun katak iha fulan-outubru ne’e orsamentu sei aloka ba iha konta bankaria suku 17 ne’e ninian.

Konstrusauun Uma Kbiit Laek rua iha aldeia Noe-Ninen ne’e, nia progresu fiziku atinje ona 45% tanba hela de’it atu taka zinku, ne’ebé akompaña hosi Ekipa Jestaun Suku no tékniku hosi ekipa Programa Nasionál Dezenvolvimentu Suku (PNDS).

Benefisiáriu Uma Kbiit Laek, Anastacia Mauno, agradese ba Governu Timor-Leste tanba apoiu ona Uma Kbiit Laek ba ema kbiit laek hanesan nia, nune’e bele hela ho dignu tanba situasaun moris hanesan ema vulnervél ne’e susár tebes atu hetan moris di’ak.

“Ami kontente. Maske uma ne’e seidauk hotu, maibé ami hakarak agradese ba Governu Timor-Leste tanba tau matanoba baa mi kbiit laek sira iha árearurál. Ami nia moris susar tebes, maibé grasa Maromak nian. Governu bele tulun ami no halo hela ami-nia hela fatin ho di’ak,” nia dehan.

Notísia Relevante: Konstrusaun ‘Uma Kbiit Laek’ iha munisípiu 12 atinje ona 25%

Jornalista : Abílio Elo Nini

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here