Administradór Postu administrativu Cailaco, munisípiu Bobonaro, Alfredo Meta Dau. Imajen//Sérgio da Cruz

BOBONARO, 07 outubru 2021 (TATOLI)-Administradór Postu administrativu Cailaco, munisípiu Bobonaro, Alfredo Meta Dau, hateten, bainhira nia komunidade iha suku ualu, simu ona vasina no atinje 90% sei implementa regra foun hodi proteze komunidade hosi transmisaun Covid-19

“Ha’u iha ona planu  polítika bainhira ha’u-nia komunidade vasina hotu, hau sei hasai desizaun ida katak se mak la vasina labele tama iha Cailaco. Maibé, ita sei hein rezultadu kampaña nasionál vasinasaun ne’ebé Ministru Ensinu Superiór halo durante loron sanolu, karik nia persentajen boot ona ita sei aplika duni,” Administradór Alfredo Meta Dau hatetetn ba jornalista Tatoli,iha suku Purugua, kinta ne’e.

Nia esplika, razaun implementa regra ne’e, atu evita transmisaun Covid-19 iha Postu administrativu Cailaco tanba bainhira nia sidadaun simu hotu ona vasina signifika protezida ona hosi pesti ne’e.

Nune’e, autoridade másima postu administrativu ne’e afirma, ba oin kualker sidadaun, tantu iha munisípiu Bobonaro inklui munisípiu seluk ne’ebé atu tama iha Cailaco, tenke hatudu karta komprovativu Vasinasaun kompletu no bainhira la kumpre regra sei la autorizada tama halo atividade.

“Planu polítika ne’e ha’u halo tanba se ema ne’e la vasina mak tama mai Cailaco nia bele hosik moras aat ne’e mai ha’u-nia komunidade, entaun sira-nia vida mós bele ameasadu. Ida ne’e la’ós ita atu bandu malu halo fronteira, maibe  atu proteze ha’u-nia povu tanba moras ne’e périgu ba ema nia vida” Nia dehan.

Nia mos husu ba administradór postu no lider komunitáriu sira iha munisípiu Bobonaro atu enkoraja ida-idak nia komunidade simu vasina, nune’e komunidade ne’ebé hakarak mai halo atividade ekonomia no seluk an iha Cailaco bele movimentu livre.

Kona-ba mekanizmu atu halo kontrolu, administradór ne’e dehan,nia sei lori planu ne’e ba diskute no halo konsultasaun ho prezidente autoridade munisípiu Bobonaro no entidade relevante hotu mak foin implementa iha prátika.

Entertantu, totál populasaun postu administrativu Cailaco, hosi idade 18 ba leten ho komorblidade ne’ebé alvu atu simu vasina hamutuk 4.182. Hosi númeru ne’e na’in 3.492 mak simu ona vasina, kompostu hosi doze promeiru 2.726, kompleta doze hamutuk 766 no sei falta 1.593 enkuanu dadaun ne’e taxa kobertura vasinasaun atinje ona 83%.

Notísia relevante:Taxa kobertura vasinasaun iha Cailaco sa’e ba 66,4%

Jornalista: Sérgio da Cruz

Editor: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here