DILI, 07 outubru 2021 (TATOLI) – Kinta kalan ne’e, iha kampu futsal FALINTIL-Forsa Defeza Timor – Leste (F-FDTL) Fatuhada Dili kontra malu entre ekipa rua Boavista FC Timor alias Panteras Negras no M-VDL Lahane iha jornada 13 jogu kontinuasaun Pra Liga Futsal Timor- Leste.

Iha hasoru malu ne’e ekipa rua (2) obrigadu tenke fahe pontu ba malu ho hanesan (1-1) tanba rezultadu serbisu ne’ebé sira halo iha kampu laran durante minutu 40 empata 2-2.

 

Hanesan baibain jogu hahú, kada jogadór sira iha kampu laran tenke lansa kontra no atake ba malu tuir kultura futeból nian ne’ebé eziste ona iha dékada hira ba kotuk.

 

Kontra no atake hirak ne’ebé ekipa rua halo hatudu duni prova no valór tanba sira lansa golu ba malu tuir oportunidade ne’ebé sira hetan no ezekuta iha kampu laran tuir saida mak treinadór haraik ba sira antes ne’e.

 

Haree ba velosidade jogu ne’ebé maka’as iha minutu lima de’it jogadór Boavista Alberto Mesquita loke uluk golu ida hodi hatuur rezultadu ba 1-0.

 

Hosi golu ne’e hanesan golu úniku iha minutu primeira parte tanba iha minutu 15 nia laran ekipa rua serbisu maka’as liuhosi duir bola ba mai iha kampu laran hosi ain ba ain maibé la rezulta tan golu ruma to’o minutu termina.

 

Bainhira semo ba segunda parte ekipa rua nafatin halo serbisu maka’as, halai ba mai ho bola hakilar-malu to’o lian hotu maran atu bele hetan oportunidade hodi halo golu.

 

Iha minutu segunda parte ne’e M-VDL konsege domina bola nune’e iha minutu 31 jogadór Jandivio Reis responde ona golu ida hodi fó rezultadu ba 1-1.

 

Boavista la lakon esperansa nafatin halo jogu. Jogadór Angelo Fernandes lansa sutu barak ba guarda rede M-VDL ne’ebé Guarda hosi Mario barak la kona iha alvu no barak guarda rede ne’e konsege baku sai.

 

M-VDL nafatin mantein iha nia pozisaun hodi luta kontra nafatin nia rivál ne’ebé fó ameasa maka’as ba nia, nune’e iha minutu 39 jogadór João de Jesus marka tan golu ida hodi hatuur rezultadu ba 2-1.

 

M-VDL garantia ona katak sira mak sei manan jogu ne’e tanba minutu atu termina ona. Maibé Boavista mantein iha nia pozisaun hodi tau nia dignidade hanesan ekipa forte hodi la entrega leet de’it pontus tolu ne’e ba M-VDL atu lori mesak. Nune’e esforsu jogadór Angelo Fernandes lori duni valór ba Boavista hodi hametin Boavista nia dignidade iha minutu 40 árbitru atu hú arbitu lian nia mós marka golu hodi muda lalais rezultadu ba 2-2.

 

Jogu ne’e dirije hosi árbitru, Euzebio Martins primeiru, segundu Timotio Rasi no rezerva José Leonito.

 

Jornalista: Hortencio Sanchez

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here