Ekipa responsável programa hosi GASC sosializa prémiu nasionál nutrisaun Primeiru-Ministru tinan 2021, ba entidade relevante, CCB Villa-antiga, kinta (07/10). Imajen TATOLI/Natalino Belo

BAUCAU, 07 outubru 2021 (TATOLI)—Ekipa responsável programa hosi Gabinete Apoiu Sosiedade Sivil (GASC, sigla portugés), Gabinete Primeiru-Ministru, halo sosializasaun ba prémiu nasionál nutrisaun tinan 2021 ba autoridade lokál no grupu potensiál sira iha Baucau.

Koordenadór ekipa sosializasaun prémiu nutrisaun setór Leste, Jaime dos Reis, hateten, objetivu atividade atu enkoraja komunidade ne’ebé servisu ba área nutrisaun no seguransa ai-han hodi bele uza direitu tomak atu aplika ba prémiu ne’e.

Koordenadór ekipa sosializasaun prémiu nutrisaun setór Leste, Jaime dos Reis. Imajen TATOLI/Natalino Belo

“Daudaun iha faze daruak, ita hahú halo sosializasaun ba grupu potensiál no Xefe suku sira, nune’e ami fó tempu aplikasaun to’o loron 20 outubru, maibé iha posibilidade atu extende bainhira to’o loron termina aplikasaun, seidauk hetan partisipasaun másimu,” Koordenadór programa informa iha Sentru Konvensaun Baucau (CCB, sigla portugés), Villa-antiga, kinta ne’e.

Aplikasaun ba prémiu nasionál hahú loke ba públiku iha loron 10 agostu no sei termina iha loron 20 outubru 2021, ho alvu ba grupu feto, joven, agrikultór, Xefe suku sira, inklui grupu suporta inan isin-rua hodi hadi’a situasaun má-nutrisaun no inseguransa ai-han ba komunidade.

Notísia relevante: Prémiu nasionál nutrisaun hodi rekoñese inovasaun timor-oan hadi’a má nutrisaun

Tuir Responsável programa, kritériu importante ba entidade ne’ebé de’it, tantu autoridade lokál ka grupu potensiál sira ne’ebé servisu maka’as atu luta hamenus má-nutrisaun no seguransa ai-han, bele prienxe formuláriu no submete dokumentu iha administrasaun munisípiu ou bele liuhosi online.

Ekipa rasik seidauk determina limitasaun aplikante, maibé to’o tempu mak iha grupu balun seidauk aplika, ekipa responsável programa sei fó oportunidade iha tempu tuir mai.

Antes ne’e, Primeiru-Ministru, Taur Matan Ruak, lansa ona dokumentu hanaran planu asaun konsolidasaun nasionál ba seguransa ai-han no nutrisaun, ne’ebé hatudu katak Timor-Leste sofre iha seguransa ai-han 36%, má-nutrisaun 47,1% no labarik krekas 8,6%.

Tuir alvu, Timor-Leste tenke redúz númeru seguransa ai-han ba zero, hamenus má-nutrisaun hosi 47,1% ba 25% no labarik isin krekas redúz ba 3%.

“Ita halo sosializasaun ba Xefe suku inklui Prezidente autoridade no postu, nune’e iha informasaun naton hodi responde ba planu asaun konsolidasaun nasionál ba seguransa ai-han no nutrisaun,” Jaime esplika.

Antes ne’e halo ona sosializasaun iha munisípiu hotu, ne’ebé iha parte Leste, konklui ona iha Manatuto, Viqueque, Lautém no ohin iha Baucau.

Notísia relevante: GPM distribui formuláriu prémiu nutrisaun ba grupu kompetitór-sira

Prezidente Autoridade munisípiu Baucau, Olívio ‘Bou-Lesa’ Freitas, enkoraja entidade relevante hodi partisipa iha sosializasaun prémiu nasionál nutrisaun Primeiru-Ministru tinan 2021, iha CCB, Villa-antiga, kinta (07/10). Imajen TATOLI/Natalino Belo

Iha fatin hanesan Prezidente Autoridade Munisípiu (PAM) Baucau, Olívio ‘Bou-Lesa’ Freitas, hateten prémiu ne’ebé fó sai hosi Primeiru-Ministru pozitivu tebes tanba bele dezenvolve nutrisaun no hadi’a seguransa ai-han di’ak liután iha Timor-Leste, atu nune’e ema hotu iha nutrisaun di’ak.

“Prémiu ne’e atu motiva ema hotu atubele servisu hadi’a nutrisaun, liuliu hahán ne’ebé konsume loron-loron,” Bou Lesa dehan.

Nune’e, Autoridade munisipál ne’e husu ba VIII Governu Konstitusionál hodi nafatin kontinua realiza prémiu nasionál kada tinan.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here