Dioseze Baucau. Imajen/Espesiál

BAUCAU, 07 outubru 2021 (TATOLI)–Bispu Dioceze Baucau, Don Basílio do Nascimento, fó sai karta sikulár, atu realiza abertura sínodu iha Dioceze Baucau atu rona hanoin sarani sira molok partisipa iha Asembleia Sínodu  Bispu iha Roma.

“Ha’u hakarak fó hanoin ba Na’i-lulik, relijiozu/a no sarani tomak Dioceze Baucau, katak iha outubru 2023 sei hala’o Asembleia Sínodu Bispu sira-nia iha Roma, nu’udar faze dahuluk Bispu sira-nia sei hala’o konsultasaun pre-sinodál. Aktu ne’e foin dahuluk akontese iha istória uma-kreda, katak Bispu sira hakarak rona uluk ninia sarani sira molok hala’o sínodu,” refere karta sikulár ne’ebé Agência TATOLI asesu, kinta ne’e.

Asembleia ne’e sei realiza ho tema ‘Para uma Igreja sinodal: comunhão, partisipação, missão’.

Iteneráriu ba Bispu sira, iha nível igreja universál sei hala’o albertura iha Roma loron 09 outubru 2021 no iha nível Dioceze sei hala’o iha loron 17 outubru 2021.

Dioceze Baucau sei realiza programa sira iha loron 15 outubru 2021 no sei realiza semináriu iha salaun São José Dioceze Baucau, hahú ho liturjia palavra iha oras 08:30.

Nune’e, Bispu Don Basílio konvida Na’i-lulik, relijiozu, leigo ou grupu kategorál hosi parókia idaidak ema na’in-lima atu partisipa iha semináriu ne’e.

Seluk tan, iha loron 16 outubru kada Parókia sei hala’o adorasaun santizmu, hahú oras 18:00 lorikaik to’o 00:00.

Iha loron 17 outubru, sei anúnsia ofisialmente albertura Sínodu Bispu sira-nia, iha nível hosi Don Basílio do Nascimento iha Dioseze Baucau no Amu Pároku sei anúnsia iha kada Parókia molok misa ramata.

“Ba ida-ne’e, Ha’u sujere atu iha Katedrál no iha Igreja parokiál, bele selebra misa dala-ida de’it ho oras ne’ebé hanesan tuku 08:00, nu’udar aktu solene ba albertura sínodu nian,” karta sirkulár informa.

Durante fulan-novembru to’o dezembru, sei halao konsulta pre-sinodál iha kada Parókia, ne’ebé Vigáriu foraneo sira mak sei sai dinamizadór iha konsulta ne’e.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here