Embaixadór Nova Zelándia, Philip Hewitt ho Diretora ADRA iha Timor-Leste, Virginia Pycroft. Imajen Tatoli//Vitorino Lopes da Costa

VIQUEQUE, 07 outubru 2021 (TATOLI)-Organizasaun internasionál ADRA iha Timor-Leste relata progresu durante serbisu hamutuk grupu kooperativa agrikuktór-sira iha munisípiu Viqueque.

Tuir Diretora ADRA iha Timor-Leste, Virginia Pycroft, Projetu FarMar komesa iha juñu 2018 ho vizaun ida atu dezenvolve korrente valór husi Nuu, Kamii, Ai-lia no Maek atu benefísia ba agrikultór sira iha Viqueque no ekonomia rurál iha Timor-Leste.

Durante ne’e, ADRA serbisu hamutuk ona ho agrikultór-sira hodi apoia sira iha treinamentu tékniku, finansiál no negósiu. Sosa-na’in identifika ona no ligadu ona ho agrikultór-sira.

“Loron ida-ne’e, ami hakarak atu selebra progresu importante husi agrikultór sira. Durante fulan neen ona ADRA serbisu hamutuk ho grupu agrikultór sira ho grupu rai no empresta osan ne’ebé ho hakarak rasik atu halo pasu hodi forma kooperativa ho asisténsia husi Sekretáriu Estadu Kooperativa,” Virginia Pycroft ba jornalista Agência Tatoli, iha Naheboruk, suku Uma Uain Kraik, Viqueque Vila, kinta ne’e.

Virginia Pycroft hatutan, ADRA oferese ona formasaun ba kooperativa-sira ne’e, nune’e bele preparadu hodi halo lansamentu. ADRA sei kontinua atu akompaña kooperativa sira ne’e iha tinan oin mai. Progresu ida-ne’e mak testamentu ba iha vizaun no serbisu husi agrikultór sira iha Viqueque.

Liuhusi kooperativa hirak ne’e agrikultór-sira sei bele agregadu kooperativa sira nune’e fasil atu sosa-na’in sira atu halo negósiu ho agrikultór sira no fornese forsa ba agrikultór sira ne’ebé mai husi serbisu hamutuk.

“Ami agradese tebes ba suport (apoiu) husi governu Nova Zelándia nebe ajuda to’o sai realidade ba ema hotu ne’ebé serbisu iha korrente de valór sira. Ami mós agradese ba Ministru Agrikultór no Peska (MAP) no Sekretáriu Estadu Kooperativa (SECoop) nia suport kontinuasaun hamutuk ho extensionista no treinadór-sira. Liuhusi serbisu hamutuk ita bele kontribui ba prosperiedade futuru ida ba autór korrente valór iha kultivu sira nee no ba ema iha Viqueque no ekonomia iha Timor-Leste,” Nia agradese.

Nune’e mós, nia husu obrigadu tan tanba sai ona parte ida husi progresu importante ida-ne’e. ADRA serbisu seidauk ramata, maibé selebra progresu ida-ne’e hodi fó hanoin nafatin ba progresu.

Iha fatin hanesan, Embaixadór Nova Zelándia iha Timor-Leste, Philip Hewitt hateten, husi progresu sira ne’e Governu Nova Zelándia iha kompromisu hakarak kontinua apoiu hodi ajuda povu agrikultór-sira.

“Ha’u kontente tebes haree progresu implementasaun programa agrikultór iha munisípiu Viqueque no Governu Nova Zelándia nafatin iha comitment boot hodi apoiu povu agrikultór iha Timor-Leste,” Nia informa.

Notísia relevante:SECoop fó pose ba dirijente kooperativa 12 iha Viqueque

Jornalista: Vitorino Lopes da Costa
Editór :Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here