Pesoál saúde prepara hela vasina kontra COVID-19, tersa (29/06). Imajen TATOLI/Francisco Sony

DILI, 06 outubru 2021 (TATOLI)—Diretora Nasionál  Rekursu Umanu Ministériu Saúde (MS), Tomasia de Sousa hateten, tinan ne’e  iha postu saúde iha  territóriu Timór laran tomak iha ona pesoál saúde na’in haat hodi halo atendimentu ba  komunidade tanba  ho prestasaun servisu hanesan kuidadu saúde primária ne’e la’o hela.

“La’ós dehan ho rekursu  umanu  limitadu  maibé ami-nia kontribuisaun  husi rekursu umanu no  atinjimentu programa ne’e barak  ho tan situasaun COVID-19  entaun hanoin katak  ho polítika Ministériu Saúde nian hateten pelumenus postu saúde  tenki tau ema mínimu ema  na’in haat  husi kategoria médiku,  parteira, enferemajem no saúde publika no tékniku aliadus   ida ne’e depende ba kobertura husi populasaun ne’ebé mak iha,’’ Diretora Nasionál  Rekursu Umanu MS, Tomasia de Sousa hateten iha nia kna’ar fatin, ohin.

Nia dehan,   tinan oin ema sei la kestiona kona-ba profisionál saúde iha postu saúde tanba uluk iha postu saúde ema na’in ida maibé tinan ida ne’e profisionál  saúde hotu hotu iha postu saúde tenki iha ema na’in haat.

“Ami halo rekrutamentu ba saúde iha familia  ne’e ami prefere liu ba  ema sira ne’ebé mak rai na’in duni tanba rekezitu ne’ebé  mak ami tau ne’e  ema nia orijinalidade duni. Ezemplu, ema iha Liaruka Ossu, ita prevee  ema ne’e mak iha postu saúde ne’ebá  tanba ema ne’e munisípiu Viqueque.  Entaun ida ne’e, ita loke konkursu públiku  nia prontu atu ba no  nia la kestiona kona-ba nia fatin. Se nia la prontu atu ba mak nia bele hatama karta rezignasaun  entaun nia prontu ona  nia tenki ba hala’o nia servisu,” Tomasia de Sousa esplika.

Tanba ne’e mak Ministériu Saúde tau planu rekruta profisionál saúde atu apoiu saúde iha familia  hamutuk 700 ne’ebé hahú servisu ona iha postu saúde sira.

“Too agora ami konklui ona rekrutamentu ba iha  programa saúde iha familia  iha munisípiu hotu hotu falta mak husi RAEOA tanba RAEOA sei prosesu hela rekrutamentu.  Ida ne’e atu apoiu ba iha  saúde  iha familia  ne’e ita ko’alia kona-ba  la’ós fó sira  saláriu regular ka salariu  permanente  maibé ita fó sira  hanesan ita fó subsidu ba sira”.

“Tanba ida ne’e mós despaxu husi  ministeriál  ida  ko’alia kona-ba profisionál hotuhotu  ne’ebé mak molok nia atu hetan  kontratu  regular  ho funsionáriu permanente  ka administrasaun  públika  nia tenki tama sistema  mínimu fulan neen  atu nune’e nia bele hatene liu nia ambiente servisu,  irarkia servisu,  no área servisu profisionál saúde loloos  ne’e  saida no sira hatene depois durante périodu ne’ebé mak sira halo sira-nia kna’ar ne’e  iha akompañamentu husi nia seniór sira”.

Depois ida ne’e, tuir ezekutiva ne’e katak halo avaliasaun ba sira (profisionál saúde).  “Se  sira prontu ona signifika sira bele  no atribui ona saida mak  sira iha ne’e bele  tama ona iha sistema tuirmai  ida ne’e mak ita halo,” Nia subliña.

Atualmente, postu saúde ne’ebé  iha territóriu Timor laran tomak hamutuk  300 resin.

Jornalista: Felicidade Ximenes

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here