Ekipa rua lansa hela kontra ataka ba malu Manu Aman FC roupa kor (Laranja) no Cavalo Fronteira uza roupa (Azul), kuarta (06/10). Iimagen Tatoli/Sérgio da Cruz

BOBONARO, 06 outubru 2021 (TATOLI)-Jogu femenina Bobonaro, époka 2021 Cavalo Fronteira FC hakur ba faze finál, hafoin halakon Manu Aman FC ho rezultadu 7:1, iha kampu futebol Maliana, kuarta ne’e.

iha inísiu jogu ekipa rua lansa kontra taka ba malu ho ida-idak nia ritmu jogu, liu de’it minutu sanolu Jogadora Ricardina Gomes (10) halo ameasa kedas ba rede adversáriu liuhosi sutu livre maibé la  rezulta golu tanba bola kona de’it guardiaun, jogu kontinua la ho tensaun maka’as ikus mai Jogadora Rofina Viegas prodús golu dahuluk iha minutu 11 hodi muda rezultadu ba 1:0.

Ho rezultadu ne’e halo ambiente jogu manas liután, Cavalo Fronteira FC lansa tan presaun iha liña oin. Oportunidade monu tan ba Cavalo FC liuhosi Jogadora Aurelia de Jesus (9), prodús tan golu ida iha minutu 22 hodi dudu rezultadu ba 2:0. Liu de’it minutu ualu Jogadora  Melania Talo (7) fura tan golu ida iha minutu 30 hodi aumenta rezultadu ba 3:0, skor refere mantein to’o arbitru deside hakotu jogu iha primeira parte maski ekipa Cavalo Fronteira iha ambisaun atu prodús tan golu.

Hakat ba segunda parte Cavalo Fronteira hasa’e tiha nia ritmu, jogu modelu meiu kampu, tenta fó ameasa bebeik ba rede adversáriu, ikusmai iha minutu 46 defeza Manu Aman hamonu Avanda Aurelia de Jesus (9) iha área risku. Nune’e, arbitru deside fó penalidade maibé oportunidade brillante ne’e Jogadora Avansada Rofina Viegas Amaral (13) la konsege ezekuta ho susesu tanba Bola ba lo’os deit guarda-rede nia liman. Guarda-rede asegura bola.

Maski nune’e, la hamate mós espiritu Manu Aman FC, jogu la’o tan iha minutu balun Manu Aman halo ameasa bebeik ba rede adversáriu. Ikusmai  iha minutu 52, Jogadora avansada Manu Aman FC Noviana Ramos (7) responde golu ida hodi fera manu tolu ba 3:2. Liu deit minitu ida jogadora avansada Cavalo fronteira Aurelia de Jesus (9) responde kedas golu ida hodi aumenta rezultadu ba 4:1.

Jogu kontinua manas tan, maibé oportunidade monu nafatin ba Cavalo Fronteira, liuhosi Jogadora Malania Talo (7) prodús tan golu ida iha minutu 56, ho transforma rezultadu ba 5:1.

Ho Rezultadu ne’e, treinadór Cavalo fronteira  halo mudansa jogu ofensivu liután, ho mudansa ne’e mós Jogadora Rofina Viegas Amaral prodús tan golu ida iha minutu 65 aumenta tan rezultadu ba 6:1. Liu de’it minutu haat Jogadora avansada Aurelia de Jesus(9) prodús tan golu hodi marka títlu Headtrick aumenta rezultadu ba 7:1. Eskor refere mantein to’o abitru hakotu jogu segunda parte hodi fó vitória ba Cavalo Fronteira hakuur ba final kontra Diabun FC, enkuantu Manu Aman FC sei kontra Faomahon hodi hodi hadau terseiru lugar.

Jogu ne’e Lidera hosi Arbritu Olivio Vicente, Asistente primeiru Longuinhos Correira, Asistente segundu Peregrino Reis no Ofisiál Arbritru João Gouveia. Arbritu hirak ne’e hetan ona formasaun hosi FFTL liuhosi departamentu Arbritrazen Nasionál ho sertifikazu nível báziku.

Tuir ajenda hosi Asosiasaun futebol Bobonaro (AFB), Faomahon FC kontra Manu aman FC sei realiza iha sesta (08/10) tuku 4:00 lorokraik, hodi hadaun titlu terseiru lugar. Enkuantu, finál ba jogu Femenina Bobonaro époka 2021,sei akontese iha sábadu (09/10) Cavalo Fronteira kontra Diabun FC hadau malu títlu kampeaun.

Jornalista: Sérgio da Cruz

Editór : Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here