Koordenadór SERVE Baucau, Raul Sanches Lajes. Imajen TATOLI/Natalino Belo

BAUCAU, 06 outubru 2021 (TATOLI)—Servisu Rejistrasaun no Verifikasaun Emprezariál (SERVE) sukursál Baucau konsege rekolla reseita hamutuk $4.368,50 ba kofre Estadu iha fulan-setembru nia-laran.

“Bainhira halo komparasaun iha fulan-agostu, Baucau rekolla de’it hamutuk $3.338,50, ne’ebé razaun tun tanba fulan-agostu tama iha implementasaun serka sanitária, maski nune’e agora reativa hikas atividade atendimentu bazeia ba reuniaun Konsellu Diretivu tuir despaixu Ministériu Koordenadór Asuntu Ekonómiku (MKAE), katak prosesu atendimentu kontinua tanba kompañia balun kontinua ho atividade ekonómika,” Koordenadór SERVE Baucau, Raul Sanches Lajes, informa ba Agência TATOLI, iha ninia knaar fatin, Villa-nova, kuarta ne’e.

Tuir koordenadór SERVE munisipál ne’e, kompañia barak mak tuir konkursu maibé rekezitu importante mak dokumentu lisensa hosi SERVE tenke válidu no aprezenta mós ho dokumentu orijinál.

Bazeia ba kliente sira-nia prezensa iha SERVE sukurál Baucau, situasaun atendimentu hahú normaliza hikas, ne’ebé razaun seluk tanba negosiante sira antisipa mós ba inspesaun hosi Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA).

“Kuaze loron-ida ami halo atendimentu hamutuk dokumentu 50-resin,” nia hatutan.

SERVE Baucau hahú halo atendimentu iha desde tinan 2018 no daudaun ne’e rejista ona kompañia foun hamutuk 656, renovasaun hamutuk 769 inklui alterasaun ka aumenta atividade hamutuk 754.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here