Komandante PNTL RAEOA Superintendente Xefe Mateus Mendes. Imajen Tatoli/Abilio Elo Nini.

OÉ-CUSSE, 06 outubru 2021 (TATOLI)—Komandante PNTL RAEOA, Superintendente Xefe Mateus Mendes Asunção, hateten Komanduu Polísia Nasionál Timor-Leste (PNTL) prezensa Ofisiál Polisia Suku (OPS) iha suku 18 hatudu progresu di’ak, tanba konsege halo prevensaun no rezolve krime, dezórden públiku iha baze ho susesu

Notísia Relevante: OPS ho lider komunitáriu partisipa sensibilizasaun kona-ba prevensaun COVID-19

“Situasaun iha komunidade la’o di’ak, tanba PNTL destaka ona OPS iha suku 18. Ita dezafia sira servisu hamutuk ho autoridade lokál sira hala’o prevensaun hodi rezolve kazu krime sira-ne’ebé durante akontese iha baze nomós kazu públiku balun. Sira-nia prezensa iha suku konsege lori mudansa ba ita-nia inan-aman sira iha área remota,” Superintendente Xefe Mateus Mendes Asunção informa ba Agênsia Tatoli iha Kuartél PNTL Santa Rosa, Oé-Cusse, kuarta ne’e.

OPS sira-nia misaun ida mak hamutuk ho xefe suku no aldeia sira ho jestór atu hela hamutuk ho populasaun sira iha baze, atu fó atendimentu ba servisu seguransa nian iha komunidade nia leet ho interese komun.

Nia fundamenta, maske OPS nia rezidénsia seidauk iha maibé nu’udar servidór Estadu mantein apoiu seguransa iha baze, servisu hamutuk ho populasaun sira iha suku ho situasaun COVID-19 no serka sanitaria.

Nia apresia tanba kooperasaun OPS ho komunidade no líder komunitáriu iha baze la’o di’ak, hodi kria amizade no hatudu progresu servisu iha atendimentu públiku ho dignu.  

“Ita espera Governu bele tau atensaun ba sira-nia nesesidade tanba sira halo servisu ho intensaun komun iha baze hodi servi povu no nasaun,” nia dehan.

Jestór sub-rejian Nitibe, Manuel Tolan, hato’o agradesimentu ba Governu tanba ho prezensa OPS iha baze ne’e konsege redús ona kazu krime tanba kazu ho tipu kiik rezolvidu iha baze.

“Ita kompara ho uluk, kazu barak mak akontese. Maibé, durante OPS sira mai iha suku ida-idak hatudu servisu kapaas tebes. Tanba, problema kiik hanesan problema animál, to’os no problema kiik seluk akontese iha suku ne’e rezolve kedas. La’ós hanesan uluk, hotu-hotu ba konsentra iha tribunál. Agora só kazu omisidiu mak lori ba tribunál maibé kazu simples sira seluk rezolvidu iha suku,” nia dehan.

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here