Edífisiu administrasaun munisípiu Viqueque. Imajen Tatoli//Vitorino Lopes da Costa

VIQUEQUE, 06 outubru 2021 (TATOLI)-Orsamentu Jerál Estadu (OJE) 2021 ne’ebé prevee ba munisípiu Viqueque hamutuk millaun lima, iha outubru ne’e, ezekuta ona 40%.

“Iha  outubru, OJE 2021, ita ezekuta ona 40%. Projetu rua maka iha, agora daudaun konstrusaun moru no jardín. Merenda eskolár ita foin la’o fila fali tanba durante ne’e eskola paradu tiha,” Administradór munisípiu Viqueque, Januario Soares ‘Boly’ ba jornalista Agência Tatoli, iha ninia knaar fatin, kuarta ne’e.

Husi progresu ezekusaun, OJE 2021, jullu Quarter primeru (Q1) 23% no iha fulan outubru ezekuta 40% ba programa perióridade sira ne’e.

Kona-ba programa merenda eskolár durante iha serka sanitária ba prevensaun Covid-19 laiha implementasaun. Maibé, agora merenda eskolár la’o fila fali iha eskola no vensimentu saláriu ba funsionariu la’o normál.

Autoridade ne’e, hateten, Planu Dezenvolvimentu Integradu Munisipál (PIDM) moru ho jardin 59 agora hala’o kontrusaun, espera tama dezenbru projetu rua ne’e bele konklui ona.

Alende ne’e nia relata, OJE 2022 aloka ba Planu Dezenvolvimentu Integradu Munisipál (PIDM), kapitál menor no kapitál dezenvolvimentu laiha hotu, tanba programa 2012 seidauk ezekuta. Tan ne’e husi nasionál la tau orsamentu ba.

“Programa sira uluk ne’e, balun konklui no balun ita laharee ninia fíziku. Ha’u la hatene ba ne’ebé tanba ne’e sei buka tuir hodi konklui,” nia haktuir.

Nune’e nia dehan, OJE 2022 munisípiu Viqueque propoin proposta hamutuk milliaun rua resin ho adisonál hamutuk miliaun haat, maibé la pasa tanba ho razaun projetu sira husi tinan 2012 sae ba.

“Husi tinan 2012 ita munisípiu Viqueque hetan milliaun 68; implementa 20, koresponde ba 33%. Ninia restu ne’e maka sei buka tuir ninia ezekusaun hodi halo netik mudansa ba munisípiu Viqueque,” nia espera.

Jornalista :Vitorino Lopes da Costa
Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here