Diretór Ezekutivu Asosiasaun HAK, Xisto dos Santos. Imajen TATOLI/Egas Cristovão.

DILI, 06 outubru 2021 (TATOLI)—Pontu deskobrimentu no dezafiu sira-ne’ebé Asosiasaun HAK deskobre liuhosi rezultadu monitorizasaun hatudu katak komunidade barak sei konsumu bee-mota, tanba ne’e ejize Governu tenke investe liu 10% iha orsamentu tinan fiskál 2022.

Ho situasaun ne’e, ekipa ida-ne’ebé lidera hosi Diretór Ezekutivu Asosiasaun HAK, Xisto dos Santos hamutuk ho Ema ho Defisiénsia ne’ebé sai membru ba plataforma Bee-Moos, Saneamentu no Ijiente (BESI) halo audiénsia ho Komisaun E ne’ebé trata asuntu Infraestrutura, atu tau atensaun sériu ba kestaun ne’e.

“Iha alokasaun Orsamentu Jerál Estadu (OJE) ba asuntu Bee, Saneamentu no Ijiene (BESI) tenke liu 10% hosi orsamentu jerál estadu. Presiza iha polítika públika ruma hosi Bee Timor-Leste, E.P hodi fó insentivu ba Grupu Maneja Fasilidade (GMF) no fó kapasitasaun, atu nune’e bele asegura sistema bee sira iha área rurál ho responsável,” Xisto dos Santos informa ba jornalista sira iha uma fukun, kuarta ne’e.

Iha audiénsia ne’e, membru BESI no deputadu sira hosi Komisaun Espesializada ne’ebé trata asuntu Infraestrutura diskute kestaun departamentu água, saneamentu no ambientál (FPA), Administradór Postu no líder komunitária sira atu halo monitorizasaun regulár hodi reforsa serbisu GMF iha bee rurál.

Pontu deskobrimentu no dezáfiu sira-ne’ebé Asosiasaun HAK deskobre liuhosi rezultadu monitorizasaun hahú hosi períodu 2019 to’o 2021 ba setór bee-moos iha munisípiu neen (6) kompostu hosi Baucau, Viqueque, Aileu, Ainaro, Dili no Ermera), hosi totál suku 57, aldeia 349, uma kain ne’ebé asesu bee-matan total 4.643.

“Uma kain ne’ebé asesu bee-mota totál 3.466. Uma kain ne’ebé asesu bee-posu ka sanyo totál 3.447 no mós total uma kain ne’ebé asesu bee kanalizasaun 34.391,” Xisto dos Santos hateten.

Amostra dadus balu hodi leno ba situasaun iha leten hatudu katak, munisípiu Dili, postu administrativu Cristo Rei, suku Camea, aldeia Lenuk Hun uma kain 123 ho totál populasaun 564 mak la asesu bee-kanalizasaun maibé asesu de’it bee-matan.

Iha munisípiu Ermera, suku Fatuquero, aldeia Palimano iha uma kain 167 ho totál populasaun 423 mak asesu ba bee-matan, tanba bee-kanalizasaun ne’ebé mak konstrui hosi PNDS aat ona.

Iha munisípiu Aileu, suku Seloi Malere, aldeia Kotabauro, komunidade uma kain 85 ho populasaun 321 mak la asesu bee-kanalizasaun tanba hela iha foho-leten.

Hosi parte munisípiu Ainaro, suku Mulo, aldeia Blehetu iha uma kain 83 ho totál populasaun 387 mak la asesu bee-kanalizasaun tanba komunidade hela iha foho-leten.

Parte munisípiu Baucau, suku Uma Ana Ulo, aldeia Osso-Gigi iha Uma kain 150 ho populasaun 543 mak la asesu bee-kanalizasaun sira asesu ba bee-matan.

Entretantu iha Munisípiu Viqueque, suku Bibileo, aldeia Aisahe uma kain 69 mak asesu ba bee-mota ho totál populasaun 341.

Rezultadu bee iha Setór Edukasaun

Hosi programa auditoria sosiál ne’ebé mak HAK hala’o iha munisípiu Ainaro hatudu iha eskola barak mak laiha bee-moos no saneamentu di’ak. Ezemplu iha eskola EBF Hatumeta-Udo sintina totálmente aat no EBF Rialico laiha sintina no bee-moos, nune’e estudante no profesór sira uza komunidade sira-nia hariis-fatin.

Rezultadu bee iha Postu Saúde

Hosi HAK nia monitorizasaun iha munisípiu neen (6) kompostu hosi Baucau, Viqueque, Aileu, Ainaro, Dili no Ermera, suku 72 ho totál postu saúde 39, hosi ne’e postu saúde 11 mak laiha bee-moos. Ezemplu postu saúde iha suku Lauala, Ermera laiha bee-moos.

Rezultadu Implementasaun Kartaun Pontuasaun ho Komunidade

Rezultadu deskobrementu HAK ho parseiru BESI liuhosi diskusaun ho komunidade no fornesedór sira iha sistema bee rurál 22 iha munisípiu Liquiçá no Manufahi relasiona ho funsionamentu sistema bee, hatudu katak estrutura Grupu Maneja Fasilidade (GMF) la funsiona ho efetivu.

HAK monitoriza, fasilitadór Postu Administrativu (FPA) la vizita sistema bee ho regulár, akompañamentu hosi autoridade lokál sira ba GMF la másimu inklui koordenasaun sira, estrutura GMF seidauk iha koordenasaun di’ak ho Parte Ofisiál Polísia Suku (OPS) liga ho sidadaun hirak-ne’ebé mak estragu sistema bee.

Konsiénsia ka sentimentu pertense hosi komunidade ba fasilidade públiku menus (tesi mangeira, kanalizasaun ilegal no sira seluk tan), iha prosesu planeamentu la envolve grupu vulnerável sira (Ema ho defisiénsia) nune’e konstrusaun sira la asesível.

Diretór Xisto dos Santos haktuir, kulturalmente estrutura iha Timor-Leste sei dominante ho sistema patriarkál, tanba ne’e partisipasaun feto iha dezenvolvimentu setór BESI sei mínimu tanba estrutura GMF mane mak sei domina.

Grupu Maneja Fasilidade (GMF) labele serbisu ho efetivu tanba sira servisu ho voluntáriu, orsamentu operasionál ba fasilitadór postu la sufisiente.

“Investimentu Orsamentu Jerál Estadu ba setór bee, saneamentu no ijiene la to’o 1% ida ne’e afeta ba atinjimentu Planu Estratejiku Dezenvolvimentu Nasionál (PEDN) ne’ebé hatuur katak 2030 ema hotu asesu bee moos ho seguru,” nia katak.

Jornalista : Evaristo Soares Martins

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here