Komunidade suku Lour, postu administrativu Bobonaro, munisípiu Bobonaro,kuru hela bee iha mota. Imajen// Facebook.

BOBONARO, 06 outubru 2021 (TATOLI)-Fulan rua ona Komunidade suku Lour, postu administrativu Bobonaro, munisípiu Bobonaro konsumu bee mota ba nesesidade uma-laran.

“Problema ne’e akontese kedas iha inísiu agostu até agora. Komunidade ba kuru bee iha mota-laran mak hodi mai uza ba hemu, te’in no haris,” Xefe Suku Lour, Miguel Lopes Gomes, informa ba jornalista Tatoli, iha Maliana, kuarta ne’e.

Lider komunitáriu ne’e haktuir problema bee moos sempre akontese tinan-tinan bainhira tama ona ba tempu bailoron naruk, halo komunidade obrigatóriu tenke la’o ba mota hodi responde nesesidade uma-laran.

Nia hateten, iha tinan 2015 Governu konsege halo reabilitasaun ba tanki bee moos iha aldeia Heliquei maibé kapasidade debitu bee moos la sufisiente atu fornese ba komunidade Lour tomak.

Alende ne’e iha 2017 Governu konsege buka tan mekanizmu seluk dada fali bee hosi área Lepo nian mai iha suku Lour, maibé obra hirak ne’e la konsege finaliza tanba kestaun dezastre naturál, distánsia no limitasaun orsamentu to’o agora abandona hela.

“Durante ne’e posu ida governu konstrui iha aldei Heliquei ne’e mak ami uza maibé tempu bailoron bee ne’e sai ita bele hatete dehan masa 5 litru ita kuru  moos hein to’o 20 to 30 minutu mak foin bele nakonu” Nia dehan.

Relasiona ho kestaun ne’e, autorodidade lokál ne’e hato’o ona pedidu ba Autoridade munisípiu Bobonaro, Governu atu solusiona problema ne’e maibé  to’ o ohin loron seidauk hetan resposta pozitivu ruma.

Dadaun ne’e lider komunitáriu ho komunidade identifika ona bee-matan rua ne’ebé sai alvu ba perfurasaun bee moos. Maibé, depende ba esforsu ne’ebé Governu atu halo.

“Bee-matan rua ne’e ida iha aldeia Heliquei, no ida iha Lepo maibé área Lour nian, horibainhira loron hirak liubá  ha’u hetan resposta pozitivu ida katak sira hosi UNDP atu mai halo survey (peskiza), maibé lahatene atu rezolve ka lae,” Nia dehan.

Nune’e mós, Komunidade Alberto dos Reis Magno, hateten atu asesu bee-moos iha mota, obrigatóriu tenke la’o ain purvolta kilometru ha’at resin no bainhira laiha ona forsa atu la’o sira tenki halibur osan hamutuk aluga karreta mak ba tula hodi mai uma.

“Ami tula iha karreta ne’e masa 5 litru ne’e ida kona 10 sentavu, kuandu bee laiha los ema ida aluga tomak de’it. Ami tula masa 50 selu $5 dolar mas ne’e uza ba te’in no hemu nian deit,” Nia haktuir via telefónika.

Nia hateten, bainhira situasaun ne’e kontinua akontese bebeik sira laiha ona kbiit atu aluga karreta ba tula bee, tanba komunidade iha suku ne’e maioria moris ho vida agrikultór ne’ebé nia rendimentu família depende liubá produtu lokál.

“Ami laiha ona osan atu selu ona ema nia karreta tanba produtu lokál sira mós durante ne’e ami la lori ba merkadu tanba preukupa liu ba kuru bee mos iha mota,” Nia dehan.

Alende ne’e problema ne’e mós afeta ba labarik sira tanba dadeer atu ba eskola tenke la’o ba haris iha mota, implika mós sira atu tama aula tuir oras letiva tuku 8:00 tanba distánsia uma ba mota dook.

Ho situasaun no kondisaun ne’e, komunidade husu ba Autoridade munisípiu Bobonaro atu tuun direita haree sira-nia prekupasaun ne’e, nune’e bele aprezenta pedidu ba Governu kompetente hodi tau iha Planu Orsamentu Jerál Estadu 2022 atu rezolve.

Entertantu Suku Lour iha Aldeia haat mak hanesan Tas Golo, Heliquei, Olo-olo no Galitaz ho totál populasaun 1.394 kompostu hosi feto 707, mane 687 no total uma-kain hamutuk 309 ho nia área luan 11,61 Km2.

Jornalista: Sérgio da Cruz

Editor: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here